Cىبايلاس جەمقورلىققا قارسى ءىس-قيمىل اگەنتتىگى استانانىڭ ەكس-اكىمى قانات سۇلتانبەكوۆ پەن LRT جشس بۇرىنعى باسشىسى تالعات ارداندى ىزدەۋ جانە ەكستراديتسيالاۋ تۋرالى جۇمىستارى قالاي ءجۇرىپ جاتقانىمەن ءبولىستى، دەپ حابارلايدى "ادىرنا" ۇلتتىق پورتالى.
سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتىنشە، ەكس-باسشى سۇلتانبەكوۆ اقش-تا.
"سونىمەن قاتار اقش زاڭناماسىنا سايكەس، ينتەرپولدىڭ قىزىل بيۋللەتەنىنىڭ بولۋى (ەكستراديتسيالاۋ ماقساتىندا ادامدى ىزدەۋ جانە قاماۋعا الۋ تۋرالى حالىقارالىق حابارلاما) قىلمىسقا قاتىسى بار ادامدى ۇستاۋعا جانە ونى قازاقستانعا ەكستراديتسيالاۋعا نەگىز بولا المايدى", - دەپ حابارلادى اگەنتتىك.
اگەنتتىك باس قالاداعى LRT-عا جاۋاپتى بولعان تالعات ارداننىڭ قايدا ەكەنىن ءالى انىقتاماعاندارىن جەتكىزدى.
"ىزدەۋدەگى اردانعا قاتىستى، ونىڭ ىشىندە باس پروكۋراتۋرا مەن ينتەرپول ۇلتتىق بيۋروسىنىڭ شەت مەملەكەتتەردىڭ قۇزىرەتتى ورگاندارىمەن ىنتىماقتاستىعى اياسىندا جەدەل-ىزدەستىرۋ شارالارى كەشەنى جۇرگىزىلىپ جاتىر", - دەلىنگەن حابارلامادا.
جەمقورلىق ارەكەتتەرىنە كۇدىكتى دەپ تانىلعان تالعات اردان بەس جىلداي ىزدەۋدە جۇرسە، ەكس-شەنەۋنىك قانات سۇلتانبەكوۆ ءتورت جىل بۇرىن ەلدەن قاشىپ كەتكەن.
