جاس اقىن قۇربانگۇل اعابەك 1996 جىلى ماۋسىم ايىنىڭ 21 جۇلدىزىندا وقو، ارىس وزەنىنىڭ بويىندا دۇنيەگە كەلگەن. قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ تۇلەگى. قازىرگى تاڭدا ىلە اۋدانى، ىنتىماق اۋىلىندا ورنالاسقان №46 مەكتەپتىڭ ۇلاعاتتى ۇستازى. وقىرمان نازارىنا جاس اقىننىڭ جۋىق ارادا جازعان تۋىندىلارىن ۇسىنامىز.
بۇلدىرگەن بالالىق
اۋىل كەشىن ساعىنام جايدارى باق،
بۇلاق اعىپ جاتاتىن سايعا قۇلاپ.
سانامىزدا سابيلىك، بالالىق بار،
بۇلدىرگەنگە شىعامىز سايلانىپ اپ.
سەكىلدى بوپ قۇربىدان قالىس قالماق،
جان ۇشىرا جۇگىرىپ نامىستى ويلاپ.
بالالىقتا بۇلدىرگەن تەرۋشى ەدىك،
توعاي ءىشىن نۋ جاعا ارىس بويلاپ.
ءبىر اۋىلدان شىعامىز ۇل، قىز بولىپ،
كەتەتىندەي شىنىمەن مىڭدى وزدىرىپ.
جاعالاسىپ ورىسپەن قايتۋشى ەدىك،
اسپانىما جاتقاندا جۇلدىز قونىپ.
قازىرگى ءومىر باسقاعا كەتتى اۋىسىپ،
بالالىعىم باسىمنان كەتتى اۋ ۇشىپ.
قايتۋشى ەدىك توعايدان از-ماز تەرگەن
بۇلدىرگەندى جول بويى جەپ تاۋىسىپ.
سوكپەۋشى ەدى اجەمىز، انامىزدا،
سەنىپ وسكەن بالا ەدىك سان اڭىزعا.
قازاق جەرى كەڭ دەۋشى ەد اجەم ءجيى،
نەگە ەركىندىك جوق ءبىزدىڭ قالامىزدا؟!
اۋىل كەشىن ساعىنام جايدارى باق،
بۇلاق اعىپ جاتاتىن سايعا قۇلاپ.
كەيدە اينادان بۇلدىرگەن قىزدى ىزدەيمىن،
ءبىرتۇرلى ءبىر تۇلعاعا اينالىپ اپ.
سىلتاۋ
سەنى كورسەم باقىتتى بوپ مارقايدىم،
قۋانىشقا اينالعانداي بار قايعىم.
جالىنىم-اۋ، كورمەگەلى ءوزىڭدى،
ءجۇزى بوپتى جارتى ايدىڭ...
اڭسارلىققا تاۋەلدى ەتىپ جاندى ار، مۇڭ،
جانارىمدى جىلاۋىق قىپ العان كىم؟
ولەڭ تەرىپ ساعىنىشتىڭ ەلىنەن،
شابىتىما الداندىم...
حات، حابارسىز سەزىمىمە شەك قىلدىڭ،
قىلىعىنا قىزىعۋشى ەم تەكتى ۇلدىڭ.
جارتى اي ءجۇرىپ سىلتاۋ ىزدەپ تاپتىم دا،
ەسىگىڭە كەپ تۇرمىن...
جۇباتاتىن جالعىز سەنسىڭ جاندى شىن،
ولەڭ بولدى ايتار ساعان العىسىم.
قالتىراعان قولىم ەسىك قاعىپ تۇر،
تۋك! تۋك!
- ارمىسىڭ!
☆★☆
سىزدە، مەن دە ءبىر باقىتتى سەزەمىز،
بىراق، نەگە ۇمتىلۋ جوق.؟
بەلگىسىز!
جاعالاۋعا تاياۋ تۇر عوي كەمەمىز،
قول سوزىڭىز، ەندى ءسىز!
جۇرەگىمە نۇر قۇيادى رەڭ بەرە،
جانىمىزعا جىلۋ سىيلاپ جارىق كۇن.
سەزىمىمدى سەزدىرمەي ەش پەندەگە،
جاسقانۋدان جالىقتىم..
باق قونار ما باسىمىزعا بىزگە اتتاس،
كەي ولەڭدە وقىرماننان جاقىنسىز.
تىرشىلىكتە قايراتتىسىز ءمىز باقپاس،
ال سەزىمدە باتىلسىز...
ايتقىم كەلدى ءوزىڭ جايلى جار سالىپ،
ماقتانىش قىپ بارلىعىنا ورتانىڭ.
كەيدە ءسىزدى سىيلاسامدا سونشالىق،
"اعا!" - دەۋگە قورقامىن...
جانارىڭمەن جىرعا تولى جانىڭمەن،
نۇر سىيلايسىڭ تۇستەن بولەك بار وڭگە.
ءبىر بولايىق جىرلارىممەن، انىڭمەن،
قۇپيالى الەمدە...
***
دوسىڭ بولسام رۇقسات پا دەپ سۇرايسىز،
سىپايىسىز، سونىڭىزبەن ۇنايسىز.
كورشى وتىرىپ كولىك ءىشى كوپ قاراپ،
سوزىڭىزبەن سىنايسىز...
جىلى ءجۇزىڭ مەيىر تۇنعان جانارىڭ،
عاشىقتىقتىڭ ايتاتىنداي بار ءانىن.
ءجيى ويىما ەلەستەيتىن تۇندەردە،
ءسىز بە ەكەنسىز قالاۋىم؟!.
ماعان جاقىن جەردە ءجيى جۇرەسىز،
مەنى سىرتتاي باقىلايسىز، بىلەسىز.
كەزدەسۋدە جاڭا تانىس ادامداي،
سەنى ۇزاق ىزدەدىم دەپ كۇلەسىز؟!.
ءبىز جولىقساق جاڭبىر جاۋىپ كەتەدى،-
دەگەنىڭىز جانعا جىلۋ ەتەدى.
سول جاۋىننىڭ استىنا قول ۇستاسىپ،
تىم الىسقا كەتىپ قالساق نەتەدى؟..
سان ءتۇرلى وي سانامىزدا ەگەستى،
كوڭىلىڭىز بولماسىنشى كومەسكى.
سىيلاسۋعا جاقىن ءارى دوس بولىپ،
رۇقسات كەرەك ەمەستى!..
***
تەرەزەدەن قويدىڭ مەنى كۇتتىرىپ،
جانارىما قالدى قانشا شىق تۇنىپ.
سۇيە تۇرا سەرتتەن تايا سالعانىڭ،
مىقتىلىق!
ساعان قالاي مەيىرىمدى تۇسىرەم؟
تاڭداپ العان جان ەڭ كوپتىڭ ىشىنەن.
ۇعىنۋعا مەنى شاماڭ جەتپەدى،
تۇسىنەم!
قالاۋىڭنىڭ جاساي الماي قانشاما،
جۇرگەنىڭدى ەلەمەدىم جان سالا.
ەركىندىكتى سەرىك ەتە الماساڭ،
اڭساما!
كەسىرىڭنەن كەسىلىپتى گۇلدەي مۇڭ،
كوڭىلىمە كەلىپ قوندى ۇيدەي مۇڭ.
ساعان ولەڭ جازعاندىعىم بولماسا
سۇيمەيمىن!
قۇربانگۇل اعابەك
"ادىرنا" ۇلتتىق پورتالى
