Jas aqyn Qurbangúl Aǵabek 1996 jyly maýsym aıynyń 21 juldyzynda OQO, Arys ózeniniń boıynda dúnıege kelgen. Qazaq Memlekettik qyzdar pedagogıkalyq ýnıversıtetiniń túlegi. Qazirgi tańda Ile aýdany, Yntymaq aýylynda ornalasqan №46 mekteptiń ulaǵatty ustazy. Oqyrman nazaryna jas aqynnyń jýyq arada jazǵan týyndylaryn usynamyz.
Búldirgen balalyq
Aýyl keshin saǵynam jaıdary baq,
Bulaq aǵyp jatatyn saıǵa qulap.
Sanamyzda sábılik, balalyq bar,
Búldirgenge shyǵamyz saılanyp ap.
Sekildi bop qurbydan qalys qalmaq,
Jan ushyra júgirip namysty oılap.
Balalyqta búldirgen terýshi edik,
Toǵaı ishin ný jaǵa Arys boılap.
Bir aýyldan shyǵamyz ul, qyz bolyp,
Ketetindeı shynymen myńdy ozdyryp.
Jaǵalasyp órispen qaıtýshy edik,
Aspanyma jatqanda juldyz qonyp.
Qazirgi ómir basqaǵa ketti aýysyp,
Balalyǵym basymnan ketti aý ushyp.
Qaıtýshy edik toǵaıdan az-maz tergen
Búldirgendi jol boıy jep taýysyp.
Sókpeýshi edi ájemiz, anamyzda,
Senip ósken bala edik san ańyzǵa.
Qazaq jeri keń deýshi ed ájem jıi,
Nege erkindik joq bizdiń qalamyzda?!
Aýyl keshin saǵynam jaıdary baq,
Bulaq aǵyp jatatyn saıǵa qulap.
Keıde aınadan búldirgen qyzdy izdeımin,
Birtúrli bir tulǵaǵa aınalyp ap.
Syltaý
Seni kórsem baqytty bop marqaıdym,
Qýanyshqa aınalǵandaı bar qaıǵym.
Jalynym-aý, kórmegeli ózińdi,
Júzi bopty jarty aıdyń...
Ańsarlyqqa táýeldi etip jandy ar, muń,
Janarymdy jylaýyq qyp alǵan kim?
Óleń terip saǵynyshtyń elinen,
Shabytyma aldandym...
Hat, habarsyz sezimime shek qyldyń,
Qylyǵyna qyzyǵýshy em tekti uldyń.
Jarty aı júrip syltaý izdep taptym da,
Esigińe kep turmyn...
Jubatatyn jalǵyz sensiń jandy shyn,
Óleń boldy aıtar saǵan alǵysym.
Qaltyraǵan qolym esik qaǵyp tur,
Týk! Týk!
- Armysyń!
☆★☆
Sizde, men de bir baqytty sezemiz,
Biraq, nege umtylý joq.?
Belgisiz!
Jaǵalaýǵa taıaý tur ǵoı kememiz,
Qol sozyńyz, endi siz!
Júregime nur quıady reń bere,
Janymyzǵa jylý syılap jaryq kún.
Sezimimdi sezdirmeı esh pendege,
Jasqanýdan jalyqtym..
Baq qonar ma basymyzǵa bizge attas,
Keı óleńde oqyrmannan jaqynsyz.
Tirshilikte qaırattysyz miz baqpas,
Al sezimde batylsyz...
Aıtqym keldi óziń jaıly jar salyp,
Maqtanysh qyp barlyǵyna ortanyń.
Keıde sizdi syılasamda sonshalyq,
"Aǵa!" - deýge qorqamyn...
Janaryńmen jyrǵa toly janyńmen,
Nur syılaısyń tústen bólek bar óńge.
Bir bolaıyq jyrlarymmen, ánińmen,
Qupııaly álemde...
***
Dosyń bolsam ruqsat pa dep suraısyz,
Sypaıysyz, sonyńyzben unaısyz.
Kórshi otyryp kólik ishi kóp qarap,
Sózińizben synaısyz...
Jyly júziń meıir tunǵan janaryń,
Ǵashyqtyqtyń aıtatyndaı bar ánin.
Jıi oıyma elesteıtin túnderde,
Siz be ekensiz qalaýym?!.
Maǵan jaqyn jerde jıi júresiz,
Meni syrttaı baqylaısyz, bilesiz.
Kezdesýde jańa tanys adamdaı,
Seni uzaq izdedim dep kúlesiz?!.
Biz jolyqsaq jańbyr jaýyp ketedi,-
Degenińiz janǵa jylý etedi.
Sol jaýynnyń astyna qol ustasyp,
Tym alysqa ketip qalsaq netedi?..
San túrli oı sanamyzda egesti,
Kóńilińiz bolmasynshy kómeski.
Syılasýǵa jaqyn ári dos bolyp,
Ruqsat kerek emesti!..
***
Terezeden qoıdyń meni kúttirip,
Janaryma qaldy qansha shyq tunyp.
Súıe tura sertten taıa salǵanyń,
Myqtylyq!
Saǵan qalaı meıirimdi túsirem?
Tańdap alǵan jan eń kóptiń ishinen.
Uǵynýǵa meni shamań jetpedi,
Túsinem!
Qalaýyńnyń jasaı almaı qanshama,
Júrgenińdi elemedim jan sala.
Erkindikti serik ete almasań,
Ańsama!
Kesirińnen kesilipti gúldeı muń,
Kóńilime kelip qondy úıdeı muń.
Saǵan óleń jazǵandyǵym bolmasa
Súımeımin!
Qurbangúl AǴABEK
"Adyrna" ulttyq portaly
