قر پرەمەر-ءمينيسترىنىڭ ورىنباسارى سەرىك جۇمانعارين ءماجىلىس كۋلۋارىندا شەگىرتكەنىڭ شىندىعىندا حالال ءونىم ەكەنىن ايتتى، دەپ حابارلايدى ”ادىرنا” ۇلتتىق پورتالى.
جۋرناليستەر پرەمەر-ءمينيستردىڭ ورىنباسارىنان زيانكەستەرمەن كۇرەس قالاي ءجۇرىپ جاتىرعانىن سۇرادى:
“شەگىرتكە ارقاشان بىزبەن بىرگە بولدى. دينوزاۆرلار مەن مامونتتاردىڭ قۇرداسى. ءبىز ونىمەن ءاردايىم كۇرەسىپ كەلەمىز، كۇرەسە بەرەمىز. كەيبىر ەلدەر ولاردى ءوندىرۋدى جانە ولاردان كەرەمەت اقۋىز تاعامدارىن دايىنداۋدى ۇيرەندى. ارينە، بۇل بىزگە كەلمەيتىن شىعار. بىراق، شىن مانىندە، بۇل حالال ءونىم،”- دەپ جاۋاپ بەردى سەرىك جۇمانعارين.
قازاقستان مۇسىلماندار ءدىني باسقارماسى، شاريعات جانە ءپاتۋا ءبولىمنىڭ مامانى ەلبەك تاسبولاتۇلى شاريعات بويىنشا شەگىرتكەنىڭ حالال ەكەنىن ايتادى.
“قمدب ۇستاناتىن حانافي ماسحابىندا پايعامباردىڭ ءحاديسى بويىنشا ەكى ولەكسە ادال ەتىلدى، سونىڭ ءبىرى — شەگىرتكە. ونى جەۋگە بولادى. الايدا، ادال دەگەن ءسوز جەي بەرۋگە بولادى دەگەن ءسوزدى شىعارمايدى. ياعني ونى جەۋ مىندەتتەلمەيدى، ءار ءوڭىردىڭ تابيعاتى مەن مادەنيەتىنە بايلانىستى جەپ/جەمەۋ اركىمنىڭ ءوز ەركىندە،”- دەيدى ءدىن قىزمەتكەرى.
جوعارىدا ايتىلعان ءحاديستى پايعامباردىڭ ساحابالارىنىڭ ءبىرى ابدۋللاح يبن ومار جەتكىزگەن. اتالعان ءحاديستى قمدب-نىڭ رەسمي سايتىنان جانە قمدب-عا تيەسىلى “حالال دامۋ” ستاندارتتاۋ جانە سەرتيفيكاتتاۋ ورتالىعىنىڭ سايتىنان تابۋعا بولادى.
