دۇيسەنبى كۇنى كەشكە الماتىنىڭ مامانداندىرىلعان اۋدانارالىق اكىمشىلىك سوتى تاۋەلسىزدىك كۇنى اكتسياسىنا قاتىسقانى ءۇشىن «ويان، قازاقستان!» قوزعالىسىنىڭ بەلسەندىلەرى بوتا ءشارىپجان مەن راۆكات مۇحتاروۆتى 15 تاۋلىككە قاماۋعا الدى، دەپ حابارلايدى «ادىرنا» ۇلتتىق پورتالى Vlast.kz سايتىنا سىلتەمە جاساپ.
سوت پروتسەسى ونلاين رەجيمدە ءوتتى. بەلسەندىلەردىڭ وزدەرى كىناسىن مويىندامادى. ولاردىڭ ادۆوكاتى عالىم نۇرپەيىسوۆ اكىمشىلىك قاماۋعا الۋ تۋرالى شەشىمگە شاعىمداناتىنىن ايتتى.
«قازىر كورىپ وتىرعانىمىز - بۇل جەردە بولىپ جاتقان حاوستىڭ جالعاسى. بۇل قازاقستانداعى بيلىك باسىنداعىلاردىڭ ەكى جاقتىلىقپەن اينالىسىپ، وتانعا دەگەن ماقتانىش پەن پاتريوتتىق سەزىمىن وياتىپ، بەلگىلى ءبىر اتاۋلى داتالارعا ءوز كوزقاراسىن بىلدىرەتىن ادامداردىڭ بۇگىنگى كۇنى قۇقىق بۇزۋشى رەتىندە تانىلعانىن اڭعارتادى. بۇل بولاشاققا قارسى قىلمىس»، - دەدى ول.
16 جەلتوقسان - تاۋەلسىزدىك كۇنى Oyan, Qazaqstan قوزعالىسىنىڭ جانە تىركەلمەگەن دەموكراتيالىق پارتيانىڭ بەلسەندىلەرى جەلتوقسان، جاڭاوزەن جانە قاڭتار كەزىندە قازا بولعانداردىڭ رۋحىنا تاعزىم ەتۋ ءۇشىن جانە ولىمگە كىنالىلەردىڭ جاۋاپقا تارتىلۋىن تالاپ ەتىپ، الماتىداعى رەسپۋبليكا الاڭىنا كەلدى.
الاڭعا بەلسەندىلەر اسەم جاپىشەۆا مەن بوتا ءشارىپجان، ازاماتتىق بەلسەندى جانە الماتى قالالىق ءماسليحاتىنىڭ دەپۋتاتتىعىنا بۇرىنعى كانديدات راۆكات مۇحتاروۆ جانە تاعى باسقالار كەلگەن. جاپىشەۆانىڭ قولىندا قاڭتار وقيعاسىندا قازا تاپقان 4 جاسار ايكوركەم مەلدەحاننىڭ پورترەتى بار ترانسپارانت بولدى.
تاۋەلسىزدىك مونۋمەنتىنىڭ جانىندا ءبىر ساعاتتاي بولعاننان كەيىن Oyan, Qazaqstan قوزعالىسىنىڭ قاتىسۋشىلارى قانتار قۇرباندارىنا ارنالعان مەموريالعا بارىپ، ءوز ترانسپارانتتارىن قالدىردى. جول بويى ولار قاڭتار كەزىندە قازا تاپقان جەتى بالانىڭ ەسىمدەرىن اتاپ ءوتتى.
«ادىرنا» ۇلتتىق پورتالى
