Dúısenbi kúni keshke Almatynyń mamandandyrylǵan aýdanaralyq ákimshilik soty Táýelsizdik kúni akııasyna qatysqany úshin «Oıan, Qazaqstan!» qozǵalysynyń belsendileri Bota Sháripjan men Ravkat Muhtarovty 15 táýlikke qamaýǵa aldy, dep habarlaıdy «Adyrna» ulttyq portaly Vlast.kz saıtyna silteme jasap.
Sot proesi onlaın rejımde ótti. Belsendilerdiń ózderi kinásin moıyndamady. Olardyń advokaty Ǵalym Nurpeıisov ákimshilik qamaýǵa alý týraly sheshimge shaǵymdanatynyn aıtty.
«Qazir kórip otyrǵanymyz - bul jerde bolyp jatqan haostyń jalǵasy. Bul Qazaqstandaǵy bılik basyndaǵylardyń eki jaqtylyqpen aınalysyp, Otanǵa degen maqtanysh pen patrıottyq sezimin oıatyp, belgili bir ataýly datalarǵa óz kózqarasyn bildiretin adamdardyń búgingi kúni quqyq buzýshy retinde tanylǵanyn ańǵartady. Bul bolashaqqa qarsy qylmys», - dedi ol.
16 jeltoqsan - Táýelsizdik kúni Oyan, Qazaqstan qozǵalysynyń jáne tirkelmegen Demokratııalyq partııanyń belsendileri Jeltoqsan, Jańaózen jáne Qańtar kezinde qaza bolǵandardyń rýhyna taǵzym etý úshin jáne ólimge kinálilerdiń jaýapqa tartylýyn talap etip, Almatydaǵy Respýblıka alańyna keldi.
Alańǵa belsendiler Ásem Jápisheva men Bota Sháripjan, azamattyq belsendi jáne Almaty qalalyq máslıhatynyń depýtattyǵyna burynǵy kandıdat Ravkat Muhtarov jáne taǵy basqalar kelgen. Jápishevanyń qolynda Qańtar oqıǵasynda qaza tapqan 4 jasar Aıkórkem Meldehannyń portreti bar transparant boldy.
Táýelsizdik monýmentiniń janynda bir saǵattaı bolǵannan keıin Oyan, Qazaqstan qozǵalysynyń qatysýshylary Qantar qurbandaryna arnalǵan memorıalǵa baryp, óz transparanttaryn qaldyrdy. Jol boıy olar Qańtar kezinde qaza tapqan jeti balanyń esimderin atap ótti.
«Adyrna» ulttyq portaly
