Düisenbı künı keşke Almatynyŋ mamandandyrylǧan audanaralyq äkımşılık soty Täuelsızdık künı aksiiasyna qatysqany üşın «Oian, Qazaqstan!» qozǧalysynyŋ belsendılerı Bota Şärıpjan men Ravkat Mūhtarovty 15 täulıkke qamauǧa aldy, dep habarlaidy «Adyrna» ūlttyq portaly Vlast.kz saityna sılteme jasap.
Sot prosesı onlain rejimde öttı. Belsendılerdıŋ özderı kınäsın moiyndamady. Olardyŋ advokaty Ǧalym Nūrpeiısov äkımşılık qamauǧa alu turaly şeşımge şaǧymdanatynyn aitty. «Qazır körıp otyrǧanymyz - būl jerde bolyp jatqan haostyŋ jalǧasy. Būl Qazaqstandaǧy bilık basyndaǧylardyŋ ekı jaqtylyqpen ainalysyp, Otanǧa degen maqtanyş pen patriottyq sezımın oiatyp, belgılı bır atauly datalarǧa öz közqarasyn bıldıretın adamdardyŋ bügıngı künı qūqyq būzuşy retınde tanylǧanyn aŋǧartady. Būl bolaşaqqa qarsy qylmys», - dedı ol. 16 jeltoqsan - Täuelsızdık künı Oyan, Qazaqstan qozǧalysynyŋ jäne tırkelmegen Demokratiialyq partiianyŋ belsendılerı Jeltoqsan, Jaŋaözen jäne Qaŋtar kezınde qaza bolǧandardyŋ ruhyna taǧzym etu üşın jäne ölımge kınälılerdıŋ jauapqa tartyluyn talap etıp, Almatydaǧy Respublika alaŋyna keldı. Alaŋǧa belsendıler Äsem Jäpışeva men Bota Şärıpjan, azamattyq belsendı jäne Almaty qalalyq mäslihatynyŋ deputattyǧyna būrynǧy kandidat Ravkat Mūhtarov jäne taǧy basqalar kelgen. Jäpışevanyŋ qolynda Qaŋtar oqiǧasynda qaza tapqan 4 jasar Aikörkem Meldehannyŋ portretı bar transparant boldy. Täuelsızdık monumentınıŋ janynda bır saǧattai bolǧannan keiın Oyan, Qazaqstan qozǧalysynyŋ qatysuşylary Qantar qūrbandaryna arnalǧan memorialǧa baryp, öz transparanttaryn qaldyrdy. Jol boiy olar Qaŋtar kezınde qaza tapqan jetı balanyŋ esımderın atap öttı.«Adyrna» ūlttyq portaly
Ūqsas jaŋalyqtar
