Aqyn, satırık, ádebıettanýshy Myńbaı Rásh ómirden ótti, dep habarlaıdy "Adyrna" tilshisi.
Bul týraly Jazýshylar Odaǵy resmı Telegram arnasynda jarııalady.
«Qalamger aǵamyzdyń jıyrmadan astam óleńder jınaǵy men satıralary kitap bolyp shyqqan. Myńbaı Rásh kóbinese satıra janrynda eńbek etip, syqaqtary men feletondary, mysaldary kórshiles, týysqan halyqtar tilderine aýdarylǵan. Zamanynda syqaq janryndaǵy eńbegin zańǵar jazýshy Ǵabıt Músirepov erekshe baǵalaǵanyn jaqsy bilemiz. Kesheden beri Qazaqstan Jazýshylar odaǵynyń basqarmasy abyz aqsaqaldy sońǵy saparǵa shyǵaryp salý máselesimen aınalysyp jatyr. Janazasy, asy qaıda, qashan ótetinin qosymsha habarlaımyz», - dep jazylǵan habarlamada.
Myńbaı Ráshtiń ómirden ótkenin Jazýshylar Odaǵynyń múshesi Ǵabıden Jakeı de jazyp, áleýmettik jelide esteligimen bólisti.
"Myńbaı Rásh kóbinese satıra janrynda eńbek etip, syqaqtary men feletondary, mysaldary kórshiles, týysqan halyqtar tilderine aýdarylǵan. Zamanynda syqaq janryndaǵy eńbegin zańǵar jazýshy Ǵabıt Músirepov erekshe baǵalaǵan eken.....93 jasynda dúnıe salyp otyr , Imanyńyz salamat bolsyn, Jazýshylar Odaǵynda 5-6 jyl qyzmettes boldyq ,óte erekshe adam edi", - dep jazdy Ǵabıden Jakeı.
Ádebıettanýshy 1930 jyly 19 qazanda Semeı oblysy, Shubartaý aýdanynyń 10-aýylynda dúnıege kelgen.
Abaı atyndaǵy qazaq pedagogıkalyq ınstıtýtynyń til jáne ádebıet fakýltetin bitirgen soń «Lenınshil jas» (qazirgi «Jas alash») gazetinde, «Ara — Shmel» jýrnaldarynda bólim meńgerýshisi bolyp eńbek etken. Keıinnen Qazaq KSR Kınematografııa jónindegi memlekettik komıtetinde, «Ǵylym» baspasy men «Qazaqstan» baspasynyń bas redaktory, Qazaqstan Jazýshylar odaǵynda ádebı keńesshi bolyp jumys istedi.
Myńbaı Ráshtiń tuńǵysh óleńder jınaǵy 1955 jyly «Alǵashqy borozda» degen atpen jaryqqa shyqty.
