2023 جىلدىڭ 1 جەلتوقسانىنداعى جاعداي بويىنشا 19 476 ەتنيكالىق قازاق تاريحي وتانىنا ورالىپ، قانداس مارتەبەسىن الدى. جالپى 1991 جىلدان بەرى رەسپۋبليكاعا 1 ميلليون 126,5 مىڭ ەتنيكالىق قازاق ورالدى، دەپ حابارلايدى «ادىرنا» ۇلتتىق پورتالى قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
بيىلعى جىلدىڭ باسىنان بەرى قازاقستانعا كەلگەن قانداستاردىڭ جارتىسىنان كوبى (51,9 پايىز) وزبەكستاننان، 19,6 پايىزى قىتايدان، 10,8 پايىزى موڭعوليادان، 8,5 پايىزى تۇركىمەنستاننان، 7,2 پايىزى - رەسەيدەن جانە 2 پايىزى - باسقا ەلدەردەن ورالعان.
اعىمداعى جىلدىڭ 1 جەلتوقسانىنداعى جاعداي بويىنشا ەڭبەككە قابىلەتتى جاستاعى ەتنيكالىق كوشىپ-قونۋشىلاردىڭ سانى 60,5 پايىز، كامەلەتكە تولماعاندار – 30,9 پايىز جانە زەينەتكەرلەر – 8,6 پايىزدى قۇرايدى.
كەلگەن ەتنيكالىق قازاقتار رەسپۋبليكانىڭ ءار وڭىرىنە قونىستاندى.
بۇل رەتتە قانداستاردى كوشىرۋ ءۇشىن جۇمىس كۇشى تاپشى وڭىرلەر انىقتالدى: اقمولا، اباي، قوستاناي، پاۆلودار، شىعىس جانە سولتۇستىك قازاقستان وبلىستارى.
ەلدى مەكەندەر بويىنشا 2023 جىلعا قانداستاردى قابىلداۋ كۆوتاسى 2337 ادامدى قۇرايدى. 2023 جىلدىڭ 1 جەلتوقسانىنداعى جاعداي بويىنشا قونىس اۋداراتىن ايماقتارعا 2053 قانداس قونىستاندى.
كەڭەس وداعى ىدىراعاننان كەيىن دەموگرافيالىق قيىندىقتارعا تاپ بولعان قازاقستان ۇكىمەتى «نۇرلى كوش» باعدارلاماسى ارقىلى قازاقتاردى اتاجۇرتقا ورالۋعا ىنتالاندىرۋدا.
الەمنىڭ 40-تان استام ەلىندە 5 ميلليونعا جۋىق قازاق تۇراتىنى بەلگىلى، ولاردىڭ دەنى 1920-1930 جىلدارداعى كسرو كەزىندەگى ساياسي قىرعىن مەن جوقشىلىقتىڭ كەسىرىنەن كوشىپ كەتكەن ۇرپاق.
«ادىرنا» ۇلتتىق پورتالى
