تۇركيادا ءبىلىم الىپ جۇرگەن قازاق جاستارى سامسۋن قالاسىندا تاۋەلسىزدىك كۇنىن ارنايى شارامەن اتاپ ءوتتى. شارانى ۇيىمداستىرۋشى اقەركە ماعزوموۆامەن «ادىرنا» ءتىلشىسى سۇحباتتاستى.
- قازىر تۇركيانىڭ قاي ۋنيۆەرسيتەتىندە، قاي فاكۋلتەتتە ءبىلىم الىپ جاتىرسىڭ؟
- مەن قازاقستانداعى جوعارى وقۋ ورنىم ۇسىنعان مۇمكىندىكتى جىبەرىپ الماي، سەمەستر تۇركيادا وقۋعا شەشىم قابىلداعانمىن. قازىر الەمنىڭ توپ 1000 ۋنيۆەرىنىڭ قاتارىنا كىرەتىن 19 mayıs ۋنيۆەرسيتەتىنىڭ ساياسات بولىمىندە وقىپ جاتىرمىن.
- 16 جەلتوقسان - تاۋەلسىزدىك كۇنى. سول اتاۋلى داتانى تۇركيا تورىندە اتاپ وتۋدە قيىندىقتار بولمادى ما؟
- جوق، كەرىسىنشە قازاقستاندا وسىنداي ۇيىمداستىرۋ، اتاپ ءوتۋ دەگەن سىندى دۇنيەلەر ماسەلەلەر بولىپ جاتادى عوي. ال بۇل جاقتاعى ۇستازدار، كەرىسىنشە، دايىندىققا ارنايى كابينەتتەر سۇراعانىمىزدا بىزگە كىشىگىرىم كونفەرەنتسيا زالىن بەردى. جاعدايىمىزدى جاسادى. سولاي قالاعانىمىزشا دايىندالدىق. باستى ماقسات – اتاۋلى كۇندى ءوز دارەجەسىندە اتاپ ءوتىپ، قازاق حالقىنىڭ تاريحىن كوپكە كورسەتۋ بولدى.
- اقەركە، ەلدىكتى ايشىقتايتىن مەرەكەنى اتاپ وتۋگە قانشا ادام قاتىستى؟ قوناقتار سانى مەن ۇيىمداستىرۋشىلار؟
- كورەرمەندەر قاتارىندا ۋنيۆەرسيتەت رەكتورىنىڭ حاتشىسى، دەكان جانە ونىڭ حاتشىسى، ءبولىم باسشىسى، ۇلكەن-ۇلكەن ۋنيۆەرسيتەتتەگى ۇستازدارىمىز، باسقا قالادان كەلگەن قازاقتار، وسى جاقتا بىرنەشە جىل بويى تۇرىپ، ەلدى اڭساعان قازاق وتباسىلار بولدى. جالپى ايتقاندا كونتسەرتتى ۇيىمداستىرۋعا 30 قازاق اتسالىستى، كورەرمەندەرمەن قوسقاندا جالپى سانى 300 ادامداي بولۋى مۇمكىن.ءتىپتى ودان كوپ دەپ ايتۋعا دا بولادى.
- تاۋەلسىزدىككە ارنالعان ءىس-شارادا قانداي قىزىقتى دۇنيەلەر بولدى؟ قازاق حالقىنىڭ مادەنيەتى مەن ءداستۇرىن قانشالىقتى تانىتتىڭىزدار؟
- مەرەكە قازاقتىڭ ءان-كۇي، ءبيىنسىز بولا ما؟ الدىمەن قوناقتاردى فۋرشەتپەن قارسى الدىق. ءتۇن ۇيقىمىزدى قيىپ، قىزدار بولىپ قازاقتىڭ ءتاتتىسى سانالعان ءدام 600 دانا باۋىرساق پىسىردىك.ودان بولەك تىسكە باسارلاردى دا قولدان دايارلادىق. كونتسەرت باعدارلاماسىندا تاريحىمىزبەن ءبولىسىپ، 16 جەلتوقساننىڭ ەلىمىز ءۇشىن قانداي ماڭىزدى ەكەنىن ايتتىق. ونىمەن قوسا مىڭ بۇرالعان بيشىلەرىمىزدىڭ ارقاسىندا قازاقتىڭ ۇلتتىق ءبيى بولدى. قازاقتىڭ اڭىز انشىلەرىنە اينالعان «دوس مۇقاسان» توبىنىڭ اندەرى، پاتريوتتىق اندەر، كونتسەرتتىڭ «فيشكاسى» بولعان «قۇداشا» قويىلىمى دا قاتار قويىلدى. ۇلتتىقتى ۇشتاستىرۋ ءۇشىن ءبىز قارا دومبىرامىزدى دا ۇمىتپادىق.
- كۇمبىرلەتە كۇي شەرتىپ، كوپتى تالانتىڭمەن تاڭعالدىرعان ءوزىڭ ەكەنسىڭ، اقەركە. شەتەلدىكتەر دومبىرانىڭ ءۇنىن قالاي قابىلدادى؟
- قارا دومبىرا ءۇنى ساحنا تورىندە مىندەتتى تۇردە ەستىلۋى ءتيىس بولدى. دومبىرا تارتقاندا ادامدار ءتىپتى جىلاپ تا الدى. اۋديتوريانى رۋحتاندىرۋ ماقساتىندا ەڭ اۋەلى «مەن قازاقپىن» انىنەن ءۇزىندى ورىنداپ، ارتىنشا «اداي»، «كوڭىل تولقىنى» سىندى كۇيلەردى شەرتتىم. شىنىمدى ايتسام، سونشالىقتى قولداۋ مەن ەرەكشە اسەردى كۇتپەدىم. دومبىرا تارتىپ جاتقاندا قول شاپالاقتاعان كورەرمەندەردى كورگەندە، قۇددى ءبىر كۇتكەندەرى دومبىرا بولعانداي بولدى. وسىنداي جاۋاپكەرشىلىكتى الىپ شىققان مەن – باقىتتىمىن.
- كەشتى ۇيىمداستىرۋ بارىسىندا قوبالجۋ بولدى ما؟ تاۋەلسىزدىك كۇنىنىڭ ماڭىزدىلىعىن سەزىنە الدىڭىزدار ما؟
- «جۇرەكتەن جۇرەككە» دەگەن وسى شىعار، بالكىم. تاعى ءبىر زەيىن قويعان نارسەمىز كورەرمەندەر، شەتەلدىكتەر سوڭىنا دەيىن وتىرۋ ءۇشىن كونتسەرت باعدارلاماسىنا قاتتى ءمان بەرگەن بولاتىنبىز. قوبالجىعانىمىز دا وسى تۇس. الايدا كورەرمەندەرىمىز شىنىمەن سوڭىنا دەيىن وتىردى. قاتتى قۋاندىق. ايتپەسە باسقا ۇلتتاردىڭ كونتسەرتتەرىندە ساحنا ورتاسىندا تۇرىپ كەتىپ قالاتىنداردى كوردىك. كاحۋت ويىنى دا بولدى، جەڭىمپازدارعا سىيلىق تاراتتىق. ءبىز كونتسەرت سوڭىندا قازاقتىڭ سالتىنا دا توقتالدىق. ءتىپتى «تۇساۋكەسەردى» دە كورسەتتىك. كىشكەنتاي بالاپان قازاقتىڭ قارا دومبىراسىن تاڭدادى.
- تاۋەلسىزدىك كۇنىن اتاپ وتۋدەگى ىشكى سەزىمىڭدى ايتىپ بەرسەڭ.
- ومىرىمدەگى ەڭ ەرەكشە تاۋەلسىزدىك كۇنىن اتاپ ءوتۋ بولدى. شەت ەلدەگى پاتريوتتىق سەزىم ەرەكشە بولادى ەكەن. ەندىگى تاڭدا وسىنداي اتاۋلى كۇنىمىزگە ءمان بەرىپ، قازاقستاندا دا جىلدا وسىلاي اۋقىمدى قىلىپ وتكىزسەك دەگەن نيەتىم بار. تاۋەلسىزدىگىمىز ماڭگى بولسىن، ەلىن، جەرىن سۇيەتىن پاتريوت جاستار كوپ بولعاي، ولار باردا - ەل دە بار!
- سۇحبات ءۇشىن راقمەت! تاۋەلسىزدىك كۇنى قۇتتى بولسىن!
سىمبات ناۋحان
«ادىرنا» ۇلتتىق پورتالى
