الماتى وبلىسى ەڭبەكشىقازاق اۋدانى شەلەك اۋىلىنداعى جانارماي قۇيۋ بەكەتىندە ءورت بولدى. بۇل تۋرالى وبلىستىق توتەنشە جاعدايلار دەپارتامەنتى جازدى، دەپ حابارلايدى «ادىرنا» ءتىلشىسى.
«2023 جىلعى 14 جەلتوقساندا ساعات 19:22-دە الماتى وبلىسى تجد كەزەكشى بولىمىنە ەڭبەكشىقازاق اۋدانى شەلەك اۋىلىندا وپەراتورلىق اۆتوجانارماي قۇيۋ بەكەتىنىڭ جانە جالپى كولەمى 30 تەكشە مەتردى قۇرايتىن جاقىن ماڭداعى تسيستەرنالاردىڭ جانعانى تۋرالى حابارلاما كەلىپ ءتۇستى.
شاقىرۋ ورنىنا الماتى وبلىسىنىڭ تجد كۇشتەرى مەن قۇرالدارى، بارلىق شۇعىل ءوزارا ءىس-قيمىل قىزمەتتەرى جىبەرىلدى.
ءورت ساعات 20:15-تە 80 شارشى مەتر اۋماقتا وقشاۋلانىپ، ساعات 21:41-دە جويىلدى. جەدەل قابىلدانعان شارالاردىڭ ناتيجەسىندە ءورت ورنىنا جاقىن ورنالاسقان گاز قۇيۋ قۇيۋ بەكەتىنە (30 م قاشىقتىقتا), مينيماركەتكە (10 م) جانە تۇرعىن ءۇي سەكتورىنا (15 م) وتتىڭ تاراۋىنا جانە جانارماي قۇيۋ تسيستەرنالارىنىڭ جارىلۋىنا جول بەرىلمەدى»،—دەلىنگەن حابارلامادا.
دەپارتامەنتتىڭ ءباسپاسوز قىزمەتى ءورت سالدارىنان 1967 جىلى تۋعان جانارماي كولىگىنىڭ جۇرگىزۋشىسى زارداپ شەككەنىن اتاپ ءوتتى. ول ورتا دارەجەدەگى تەرميالىق كۇيىك العان.
قازىرگى تاڭدا ءورتتىڭ سەبەبىن انىقتاۋ ءۇشىن الماتى وبلىسى تجد سىناق ءورت زەرتحاناسى مەن انىقتاۋ ءبولىمىنىڭ قىزمەتكەرلەرى جۇمىس ىستەپ جاتىر.
ءورتتى سوندىرۋگە الماتى وبلىسى تجد 20 قىزمەتكەرى مەن 8 تەحنيكاسى، اۋداندىق پوليتسيا ءبولىمىنىڭ 5 قىزمەتكەرى مەن 2 تەحنيكاسى، جەدەل مەديتسينالىق جاردەم بريگاداسىنىڭ 3 قىزمەتكەرى مەن تەحنيكاسى جۇمىلدىرىلدى.
