تارازدىق تۇرعىندارعا ىستىق سۋ قىركۇيەك ايىندا بەرىلەدى

تاراز قالاسىندا تۇرعىندارعا ىستىق سۋ قىركۇيەك ايىندا بەرىلەدى. بۇل تۋرالى بۇگىن وكق الاڭىندا وتكەن ءباسپاسوز كونفەرەنتسياسىندا ايتىلدى، – دەپ حابارلايدى “ZhambylNews” اقپاراتتىق اگەنتتىگى. جيىنعا جامبىل وبلىسى اكىمدىگىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى قۇدايبەرگەن قورعانباەۆ، «تارازەنەرگوورتالىق» اق پرەزيدەنتى ابۋتاليپ سەريكباەۆ، «تارازترانسەنەرگو» مكك ديرەكتورىنىڭ م.ا. جاقسىلىق جوگيباەۆ، «تەمىر جول-جىلۋ» مكك ديرەكتورى عايني يسابەكوۆ قاتىستى. سپيكەرلەردىڭ سوزىنشە، تاراز قالاسىنىڭ جىلۋمەن قامتاماسىز ەتەتىن كاسىپورىندارىندا 2019-2020 جىلدارعا جىلىتۋ ماۋسىمىنا دايىندىق ءىس-شارا جوسپارى ازىرلەنىپ بەكىتىلگەن. اعىمداعى جىلى وبلىس بويىنشا جىلۋمەن قامتيتىن كاسىپورىندار اعىمداعى جانە كۇردەلى جوندەۋ جۇمىستارىنا 626,83 ملن. تەڭگە قاراستىرىلعان. ال «جامبىل-جىلۋ» كاسىپورىننىڭ رك-1 قازاندىعىنان قالاداعى 82 كوپقاباتتى تۇرعىن ۇيلەر ىستىق سۋ الۋدا، ياعني، ىستىق سۋ الداعى جىلىتۋ ماۋسىمىنا دەيىن ۇزدىكسىز بەرىلەتىن بولادى. ولار: «قاراتاۋ» (2), «قاراسۋ» (5) ىقشام اۋداندارى مەن «ماسسيۆ قاراسۋ»، «قانت كەنتى» ماسسيۆتەرى. سونداي-اق، «تەمىرجول-جىلۋ» كاسىپورنى بويىنشا «گازوۆايا» قازاندىعىنان بايزاق باتىر كوشەسىندەگى 19 كوپقاباتتى تۇرعىن ۇيگە ىستىق سۋ بەرۋدى اعىمداعى جىلدىڭ 5 ماۋسىمىنان باستاپ توقتاتىلدى. بەكىتىلگەن جوسپار بويىنشا اتالعان ۋچاسكىدە جىلۋ جەلىلەرىنىڭ جوندەۋ جۇمىستارى جۇرگىزىلەتىن بولادى.