قوستاناي وبلىسىندا بەس بالا كوكجوتەل جۇقتىرعان. بۇل تۋرالى “كوستانايسكيە نوۆوستي” باسىلىمى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، كوكجوتەل جۇقتىرعان ءبىر بالا ءبىر جاسقا دا تولماعان، ال قالعاندارى ءبىر جاستان بەسكە دەيىنگى بالالار.
بالالار بۇل ينفەكتسياعا قارسى ەكپە الماعانى اتاپ ءوتىلدى. ءۇش بالانىڭ اتا-اناسى جەكە سەنىمىنە بايلانىستى ەكپەدەن باس تارتقان.
"كوكجوتەل - Bordetella تۇقىمداس باكتەريالار تۋدىراتىن جۇقپالى اۋرۋ. اۋرۋ كاتارالدى بەلگىلەرى بار پاروكسيزمال جوتەلمەن سيپاتتالادى. بۇل جاعدايدا ناۋقاستا جۇرەك-قان تامىرلارى، تىنىس الۋ ورگاندارى جانە جۇيكە جۇيەسى زاقىمدالادى", - دەپ ءتۇسىندىردى سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى گۇلىم دوسۋموۆا.
كوكجوتەلدىڭ ينكۋباتسيالىق كەزەڭى 3 كۇننەن 14 كۇنگە دەيىن. ەڭ ءتيىمدى پروفيلاكتيكالىق شارا - ەكپە الۋ. ۆاكتسيناتسيا اتا-اناسىنىڭ رۇقساتىمەن بالالارعا جۇرگىزىلەدى.
