بۇگىن جامبىل وبلىسىنىڭ اكىمى اسقار مىرزاحمەتوۆتىڭ توراعالىعىمەن اۋداندار مەن تاراز قالاسىندا شاعىن سپورت الاڭشالارىن سالۋ ماسەلەلەرى تۋرالى جيىن ءوتتى.
كۇن تارتىبىندەگى ماسەلە بويىنشا وبلىس اكىمدىگىنىڭ سپورت جانە دەنە شىنىقتىرۋ باسقارماسىنىڭ باسشىسى نۇربول جۇنىسبەكوۆ بايانداما جاسادى. ول بۇگىندە وڭىرىمىزدەگى قولدانىستا بارلىعى 1185 سپورت الاڭشاسى مەن عيماراتى بار ەكەندىگىن جەتكىزدى. ونىڭ 423-ءى فۋتبول، 213-ءى باسكەتبول، 279-ى ۆولەيبول الاڭشالارى.
سونداي-اق، باسقارما باسشىسى اۋداندار مەن تاراز قالاسىنا جۇرگىزىلگەن زەردەلەۋ جۇمىستارىنىڭ قورىتىندىسىنا توقتالىپ، 203 نىساندا ءارتۇرلى دەڭگەيدە اقاۋلار انىقتالعانىن ايتتى. ولار بويىنشا جوندەۋ جانە رەتتەۋ جۇمىستارى اعىمداعى جىلى جۇرگىزىلۋ كەرەكتىگىن تىلگە تيەك ەتتى.
اسقار يسابەكۇلى انىقتالعان 203 نىسان بويىنشا جان-جاقتى تالداۋ جۇمىستارى جەتكىلىكسىز دەڭگەيدە جۇرگىزىلگەنىن باسا ايتتى. اقاۋدىڭ دەڭگەيىنە، ونى جوندەۋ مەن رەتتەۋگە كەتەتىن شىعىندار قۇنىنا ناقتى تالداۋلار جوق.
ءوڭىر باسشىسى قالپىنا كەلتىرۋ جۇمىستارىن تەك بيۋدجەت ەسەبىنەن عانا ەمەس، دەمەۋشىلەر تاراپىنان نەمەسە كوممۋنالدىق مەكەمە ەسەبىنەن جۇرگىزۋدىڭ جولدارىن قاراستىرۋدى تاپسىردى. بۇل بويىنشا جوسپار كەستەسىن قۇرىپ، وندا ءار نىساننىڭ جوندەۋ جۇمىستارىنىڭ اياقتالار مەرزىمىن ناقتى بەلگىلەپ، كەستەگە سايكەس قاداعالاۋ-باقىلاۋ شارالارىن ۇيىمداستىرۋدى جۇكتەدى.
سونداي-اق، وبلىس اكىمى اۋداندار جانە تاراز قالاسى بويىنشا سپورت الاڭشالارىنا دەگەن قاجەتتىلىكتى تەز ارادا شەشۋ كەرەكتىگىنە نازار اۋدارتتى. ءبىر الاڭشا اۋماعىندا تەك فۋتبول عانا ەمەس، باسكەتبول، ۆولەيبول الاڭشالارىن ىڭعايلاستىرىپ، ورناتۋدىڭ ماڭىزدىلىعىنا توقتالدى. بۇل بۇعان دەيىن سوعىلعان جانە الداعى ۋاقىتتا بوي كوتەرەتىن سپورت نىساندارىنا دا قاتىستى. وسى ورايدا كوممۋنالدىق مەكەمەلەردىڭ مۇمكىنشىلىگىن پايدالانا وتىرىپ، بيۋدجەت قاراجاتىن بارىنشا ءتيىمدى جۇمساۋدى ەسكەرتتى. جيىندا كوتەرىلگەن ماسەلەلەر بويىنشا جاۋاپتى تۇلعالارعا ناقتى تاپسىرمالار جۇكتەلىپ، 10 كۇن ۋاقىت بەرىلدى.
