Búgin Jambyl oblysynyń ákimi Asqar Myrzahmetovtyń tóraǵalyǵymen aýdandar men Taraz qalasynda shaǵyn sport alańshalaryn salý máseleleri týraly jıyn ótti.
Kún tártibindegi másele boıynsha oblys ákimdiginiń sport jáne dene shynyqtyrý basqarmasynyń basshysy Nurbol Júnisbekov baıandama jasady. Ol búginde óńirimizdegi qoldanysta barlyǵy 1185 sport alańshasy men ǵımaraty bar ekendigin jetkizdi. Onyń 423-i fýtbol, 213-i basketbol, 279-y voleıbol alańshalary.
Sondaı-aq, basqarma basshysy aýdandar men Taraz qalasyna júrgizilgen zerdeleý jumystarynyń qorytyndysyna toqtalyp, 203 nysanda ártúrli deńgeıde aqaýlar anyqtalǵanyn aıtty. Olar boıynsha jóndeý jáne retteý jumystary aǵymdaǵy jyly júrgizilý kerektigin tilge tıek etti.
Asqar Isabekuly anyqtalǵan 203 nysan boıynsha jan-jaqty taldaý jumystary jetkiliksiz deńgeıde júrgizilgenin basa aıtty. Aqaýdyń deńgeıine, ony jóndeý men retteýge ketetin shyǵyndar qunyna naqty taldaýlar joq.
Óńir basshysy qalpyna keltirý jumystaryn tek bıýdjet esebinen ǵana emes, demeýshiler tarapynan nemese kommýnaldyq mekeme esebinen júrgizýdiń joldaryn qarastyrýdy tapsyrdy. Bul boıynsha jospar kestesin quryp, onda ár nysannyń jóndeý jumystarynyń aıaqtalar merzimin naqty belgilep, kestege sáıkes qadaǵalaý-baqylaý sharalaryn uıymdastyrýdy júktedi.
Sondaı-aq, oblys ákimi aýdandar jáne Taraz qalasy boıynsha sport alańshalaryna degen qajettilikti tez arada sheshý kerektigine nazar aýdartty. Bir alańsha aýmaǵynda tek fýtbol ǵana emes, basketbol, voleıbol alańshalaryn yńǵaılastyryp, ornatýdyń mańyzdylyǵyna toqtaldy. Bul buǵan deıin soǵylǵan jáne aldaǵy ýaqytta boı kóteretin sport nysandaryna da qatysty. Osy oraıda kommýnaldyq mekemelerdiń múmkinshiligin paıdalana otyryp, bıýdjet qarajatyn barynsha tıimdi jumsaýdy eskertti. Jıynda kóterilgen máseleler boıynsha jaýapty tulǵalarǵa naqty tapsyrmalar júktelip, 10 kún ýaqyt berildi.
