1997 jyly 10 jeltoqsanda Qazaqstan astanasy Aqmola qalasyna kóshirildi, dep habarlaıdy "Adyrna" tilshisi.
1997 jyly 10 jeltoqsannan bastap Aqmola Qazaqstannyń astanasy bolyp resmı túrde jarııalandy.
Jańa astanany salý ıdeıasy eks-prezıdent Nursultan Nazarbaevqa tıesili bolǵan.
Almatynyń astana dárejesin Aqmolaǵa berý týraly sheshim 1994 jyly 6 shildede Elbasynyń usynysymen Qazaqstannyń Joǵarǵy keńeste qabyldanǵan.
1997 jyly 20 qazanda Nazarbaev elordany aýystyrý týraly jarlyqqa qol qoıǵan.
Elordany aýystyrý týraly sheshim qabyldanǵan kezde, Aqmola qalasynda 290 myńdaı ǵana halyq turǵan. Tuńǵysh prezıdent bul sheshimin «Eýrazııa júreginde» atty kitabynda túsindirgen:
«Aqmola Qazaqstannyń geografııalyq ortalyǵy deýge bolatyn, Qazaqstan ekonomıkasynyń órleýinde jetekshi de óskeleń núkteleri bolyp otyrǵan mańyzdy sharýashylyq óńirlerge jaqyn ornalasqan. Qala iri kóliktik arnalardyń qıylysynda, toǵyz joldyń torabynda tur. Budan basqa, qala Qazaqstan úshin kóptegen shet elge shyǵýdyń meılinshe tóte joly – transeýroazııa arnalaryna taıaý qonystanǵan», – dep jazǵan Nursultan Ábishuly.
1997 jyldary stananyń irgetasyn qalaǵandardyń biri, QR eńbek sińirgen sáýletshisi Serik Rýstambekovtiń esteliginde:
"10 jeltoqsan - men úshin, el úshin umytylmas kún. 1991 jyly 10 jeltoqsanda Qazaqstan Respýblıkasynyń Tuńǵysh Prezıdenti ant qabyldady. Men ol kezde Qazaq KSR Joǵarǵy Keńesiniń depýtaty boldym. Sodan keıin QazKSR-di Qazaqstan Respýblıkasy dep ózgertý týraly zań qabyldandy. 1993 jyly 10 jeltoqsanda Qazaqstan Respýblıkasy Joǵarǵy Keńesiniń taraýy ótti, ol jerde men depýtat, qurylys jáne sáýlet komıteti tóraǵasynyń orynbasary boldym. 1997 jyly Aqmola qalasy resmı túrde astana bolyp jarııalandy. Jınalys ótkizildi, qalanyń kilti ákelindi. Saltanatty rásim ákimdiktiń aldyndaǵy alańda ótti. Kórermender aldynda minberde Qazaqstan Respýblıkasynyń Tuńǵysh Prezıdenti sóz sóıledi, men sol toptyń ishinde turdym. Kún aıaz boldy. Tańqalarlyqtaı jańa qala quryldy. Astanamyz tek ákimshilik emes, iskerlik, mádenı jáne sport ortalyǵyna aınaldy. Bul meniń jumysymnyń bóligi", - dedi sáýletshi.
