جامبىل وبلىسى مويىنقۇم اۋدانى قىلىشباي اۋىلىندا 538 ملن تەڭگەگە سالىنعان سۋ عيماراتى ىستەن شىقتى. بۇل تۋرالى Qazaqstan تەلەارناسى جاريالادى، دەپ حابارلايدى “ادىرنا” ۇلتتىق پورتالى.
مالىمەتكە سۇيەنسەك، اۋىل تۇرعىندارى ەكى جىلدان بەرى نىساننىڭ يگىلىگىن كورە الماي كەلەدى. ستانتسيانىڭ قۇبىرىنان سارىلداپ سۋ اعۋدىڭ ورنىنا لاي-باتپاق شىعىپ جاتىر. جۇمىسى توقتاعان ستانتسيا، اكىمدىك ەسەبىندە قولدانىستا دەپ كورسەتىلىپتى.
اۋىلعا سۋ كۇنارا تراكتورمەن تاسىمالدانادى. جەرگىلىكتى بيلىك وكىلدەرى گەولوگيالىق بارلاۋ جۇمىسىنىڭ ساپاسىز جۇرگىزىلگەندىگىن مويىنداپ وتىر. ەندى كومپانيانى سوتقا بەرمەك. ال اۋىزسۋ ستانساسىنا كەلەر كوكتەمدە جوندەۋ جۇرگىزىلەدى دەپ سەندىردى.
«بۇل جەردە گەولوگيالىق زەرتتەۋ جۇرگىزگەندە وسى جەردىڭ سۋى ءتاتتى دەپ بەرگەن. و باستا، سول قاتەلىك بولىپ ارتىنان وسىعان تىرەلدى. بارلاۋ كەزىندە قاتەلىك كەزىندە. ءتاتتى دەگەن سوڭ سالىنعان»، - دەيدى قىلىشباي اۋىلىنىڭ اكىمى باكىر يسابەكوۆ.
