الماتى وبلىسىنداعى جاپەك باتىر اۋىلىنىڭ تۇرعىندارى جاسوسپىرىمدەر اراسىندا بولعان توبەلەستىڭ ءبىرىنشى رەت ەمەس ەكەندىگىن ايتادى، دەپ حابارلايدى «ادىرنا» ۇلتتىق پورتالى «استانا» تەلەارناسىنا سىلتەمە جاساپ.
اۋداندىق ءبىلىم ءبولىمى جاپەك باتىر اۋىلىنداعى ءارتۇرلى مەكتەپتەردىڭ جاسوسپىرىمدەرى توبەلەس ۇيىمداستىرعانىن حابارلاعان بولاتىن. وقيعانىڭ جەلىسى بويىنشا، جىگىتتەر فۋتبول ويناپ، ولاردىڭ اراسىندا جانجال شىعىپ، ول توبەلەسكە ۇلاسقان. توبەلەس سالدارىنان ءبىر بالا جاراقات الىپ، قازىر اۋرۋحانادا جاتىر.
«توبەلەس كەزىندە ءبىر وقۋشى زارداپ شەكتى، ول قازىر الماتى وبلىسىنىڭ بالالار اۋرۋحاناسىندا ەم قابىلداپ جاتىر. جاعدايى جاقسى. وسى توبەلەسكە قاتىسقان وقۋشىلاردىڭ مەكتەپ ديرەكتورلارى جاۋاپقا تارتىلادى»، - دەيدى الماتى وبلىسى ىلە اۋداندىق ءبىلىم ءبولىمىنىڭ ادىسكەرى زارينا باقىتجان.
ال اۋىل تۇرعىندارى ارنا تىلشىلەرىنە ەكى مەكتەپ وقۋشىلارىنىڭ اراسىندا مۇنداي كەلىسپەۋشىلىك ءبىرىنشى رەت بولىپ وتىرعان جوق دەپ ايتتى.
«ۇلداردىڭ اراسىندا ورتا دەگەن ۇعىم بار. ولار توپقا بولىنەدى. ال بۇل توپتاردىڭ اراسىندا تۇسىنىسپەۋشىلىك تۋىندايدى. سوڭعى رەت مۇنداي كەلىسپەۋشىلىك وسىنداي ناتيجەگە اكەلدى»، - دەيدى اينۇر اۋىلىنىڭ تۇرعىنى.
پوليتسەيلەر جانجالعا قاتىسقان كامەلەتكە تولماعانداردىڭ بارلىق اتا-انالارىنا قاتىستى قر اقبتك-ءنىڭ 127-بابى (كامەلەتكە تولماعان بالانى تاربيەلەۋ، ونىڭ قۇقىقتارى مەن مۇددەلەرىن قورعاۋ جونىندەگى مىندەتتەردى ورىنداماۋ) بويىنشا اكىمشىلىك ماتەريالدار وندىرىلگەنىن حابارلادى), ال كامەلەتكە تولماعانداردىڭ وزدەرىنە قاتىستى قر اقبتك-ءنىڭ 435-بابى (كامەلەتكە تولماعاندار جاساعان بۇزاقىلىق) بويىنشا حاتتامالار تولتىرىلدى.
ەسكە سالا كەتەيىك، الەۋمەتتىك جەلىدە الماتى وبلىسىندا مەكتەپ وقۋشىلارىنىڭ جاپپاي توبەلەسىپ جاتقان ۆيدەوسى تاراعان بولاتىن. ءتارتىپ ساقشىلارىنىڭ ايتۋىنشا، وقيعا 29 قاراشادا وبلىستىڭ ىلە اۋدانىندا بولعان. تەكسەرۋ بارىسىندا 9-سىنىپ وقۋشىسى مەن 10-سىنىپ وقۋشىسى اراسىندا كەلىسپەۋشىلىك تۋىنداپ، كەيىن ول جاپپاي توبەلەسكە ۇلاسىپ كەتكەنى انىقتالدى.
«ادىرنا» ۇلتتىق پورتالى
