الماتى وبلىسى ىلە اۋدانى جاپەك باتىر اۋىلىندا مەكتەپ وقۋشىلارى جاپپاي توبەلەسكەن. بۇل تۋرالى وبلىستىق پوليتسيا دەپارتامەنتىنىڭ ءباسپاسوز حاتشىسى مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، وقيعا 29 قاراشادا بولعان.
وقۋشىلاردىڭ توبەلەسكەن ۆيدەوسى الەۋمەتتىك جەلىدە تارادى.
"تەكسەرۋ بارىسىندا 9-سىنىپ وقۋشىسى مەن 2007 جىلعى 10-سىنىپ وقۋشىسى اراسىندا كەلىسپەۋشىلىك تۋىنداپ، كەيىننەن جاپپاي توبەلەسكە ۇلاسقانى انىقتالدى", - دەيدى ۆەدومستۆو.
قاجەتتى تەرگەۋ ارەكەتتەرى باستالدى. قازىرگى كۇنى وقۋشىلارمەن پسيحولوگتار جۇمىس ىستەپ جاتىر.
"سونىمەن قاتار توبەلەسكەن جاسوسپىرىمدەردىڭ اتا-انالارىنا قاتىستى قر اقبتك-ءنىڭ 127, 435-باپتارى بويىنشا 17 اكىمشىلىك حاتتاما تولتىرىلدى. ال 4 وقۋشى جانساقتاۋ بولىمىنە ءتۇستى دەگەن اقپارات جالعان. بالالاردىڭ بارلىعى ءدىن-امان، ۇيىندە", - دەيدى پد ءباسپاسوز قىزمەتى.
