الماتى قالالىق پوليتسيا دەپارتامەنتى دۇيسەنبىدە ايتىس اقىنى رينات زايىتوۆ ۇستالعاننان كەيىن بولعان جايتقا بايلانىستى تۇسىنىكتەمە بەردى.
پوليتسيا دەپارتامەنتى Facebook پاراقشاسىندا جاريالاعان حابارلاماسىندادۇيسەنبى كۇنى كەشكە قاراي الاتاۋ اۋدانىندا رۇقسات ەتىلمەگەن ميتينگىدەن ۇستالىپ، پوليتسياعا جەتكىزىلگەن رينات زايىتوۆپەن ءتۇسىندىرۋ جۇمىسىن جۇرگىزگەننەن كەيىن ونى ۇيىنە قويا بەرگەنىن ايتادى.
"ارادا ءبىراز ۋاقىت وتكەندە پوليتسيا دەپارتامەنتىنىڭ الدىنا ءبىر توپ ادام جينالىپ، رينات زايىتوۆپەن كەزدەسۋدى تالاپ ەتتى. ولارعا زايىتوۆتىڭ ۇيىنە كەتكەنى ايتىلعانىمەن جينالعاندار تاراۋعا اسىقپادى" دەلىنگەن حابارلامادا.
پوليتسيانىڭ ايتۋىنشا، بيلىك ورگاندارىنىڭ سۇراۋىمەن رينات زايىتوۆ وزىمەن كەزدەسۋدى تالاپ ەتىپ جينالعان ازاماتتارعا جولىعىپ، "زاڭدى بۇزباۋعا جانە قۇقىق قورعاۋ ورگاندارىنىڭ زاڭدى تالابىن ورىنداۋعا" شاقىرعان.
رينات زايىتوۆ دۇيسەنبى كۇنى ساعات 23:00 شاماسىندا پوليتسيا دەپارتامەنتى ماڭىنا ءوزىن قولداپ جينالعاندارمەن كەزدەسىپ، ولاردىڭ تاراۋىن وتىنگەننەن كەيىن كولىگىنە وتىرىپ كەتىپ قالعانى تۋرالى ازاتتىق حابارلاعان.
ارادا ءبىراز ۋاقىت وتكەندە الماتىدا پوليتسيا تولە بي كوشەسىنىڭ بويىندا ونداعان ادامدى ۇستاعانى تۋرالى اقپارات تارادى. قازتاگ اگەنتتىگىنىڭ حابارلاۋىنشا، "العا، رينات!", "جاسا، قازاقستان!" دەپ ايعايلاعان ادامدار مىنگەن ونداعان اۆتوكولىك كوللونناسىن پوليتسيا مەن ارنايى جاساق قۋىپ جەتىپ، توقتاتقان. كەيىن پوليتسيا مەن ۇلتتىق ۇلان ساربازدارى "سايران" اۆتوۆوكزالى ماڭىندا ادامداردى ۇستاي باستاعان.
الماتى قالالىق پوليتسيا دەپارتامەنتى ازىرگە بۇل وقيعا تۋرالى تۇسىنىكتەمە بەرگەن جوق.
10 ماۋسىمدا الماتىدا كەشكى ساعات 18.00 شاماسىندا باۋىرجان مومىشۇلى - تۇرار رىسقۇلوۆ كوشەلەرى قيىلىسىنداعى الاتاۋ تەاترى ماڭىنا ءبىر توپ ادام جەكسەنبى كۇنى ەلدە وتكەن كەزەكتەن تىس پرەزيدەنت سايلاۋىنىڭ رەسمي الدىن الا قورىتىندىسىنا نارازىلىق بىلدىرگەن. پوليتسيا ول جەردەن ۇستاپ اكەتكەن ونداعان ازاماتتىڭ اراسىندا ايتىسكەر رينات زايىتوۆ تا بولعان.
"ازاتتىق" راديوسى
