ءتۇرلى پاراقشالارداعى دەرەكتەرگە سۇيەنسەك، نازارباەۆ ءوزىنىڭ ەستەلىكتەرى كىتاپ ەتىپ جازعان. كىتاپ «مەنىڭ ءومىرىم. تاۋەلدىلىكتەن بوستاندىققا دەيىن» دەگەن اتپەن جارىققا شىعۋعا دايىندالۋدا، دەپ حابارلايدى "ادىرنا" پورتالى تەلەگرام ارنالاردىڭ بىرىندەگى اقپاراتقا سىلتەپ.
كىتاپتا ەكس-پرەزيدەنتتىڭ 90-جىلدارداعى قيىندىقتارى، ەلوردا قۇرىلىسى، ءوز ءومىرىنىڭ ايتىلماعان تۇستارى جانە ت.ب. دۇنيەلەر قامتىلعان، دەلىنگەن دەرەككوزدە.
سول كىتاپتا نازارباەۆتىڭ اسەل يساباەۆامەن ەكىنشى وتباسى قۇرعانىن مويىنداۋى ەرەكشە نازار اۋدارتاتىن سياقتى. سوندا نازارباەۆ ساياساتتاعى قاتەلىگىن ەمەس، ەكىنشى نەكەسىن مويىنداعانداي اسەر قالدىرادى.
اسەل يساباەۆا تۋرالى كوپتەن بەرى ايتىلىپ كەلە جاتىر. ءتىپتى اسەلدىڭ "الەكسەي" دەگەن لاقاپ اتى دا تەلەفون ارقىلى سويلەسكەن كەزدە نازارباەۆتىڭ قول استىنداعىلار پايدالاناتىن كودتىق ەسىمگە اينالىپ كەتكەن. بۇل تۋرالى دەرەكتەر اقپارات الاڭىندا مول. بىراق وسى كۇنگە دەيىن ونى ەشكىم راستاماعان جانە جوققا دا شىعارماعان.
مەمۋار-ەستەلىگىندە ەكس-پرەزيدەنت يساباەۆامەن مۇسىلماندىق نەكە قيعانىن ايتىپ، ودان تاۋمان (2005 جىلى تۋعان) مەن بايكەن (2010 جىلى تۋعان) ەسىمدى پەرزەنت سۇيگەنىن راستاعان سياقتى.
سونداي-اق، كىتاپتا 2011 جىلعى جاڭاوزەندەگى وقيعا، 2019 جىلعى بيلىك ءترانزيتى، قاندى قانتار وقيعاسىنا بولەك تاراۋلار ارنالعان. قازىرگى پرەزيدەنت توقاەۆتىڭ دا اتى اتالىپ، ولاردىڭ قارىم-قاتىناسىنىڭ ءبىر-ەكى قىزىق، بۇرىن ەستىمەگەن تۇستارى دا ايتىلاتىن كورىنەدى.
ازىرگە كىتاپتىڭ ساتىلىمعا قاشان شىعاتىنى بەلگىسىز. الايدا، بەلگىلى ساياساتكەرلەر مەن بىرنەشە قوعام بەلسەندىلەرى العاشقى وقىرماندار ساناتىنان تابىلعان سىڭايى بار.
بۇعان دەيىن، جازۋشى بەيبىت ساپارالى “كورىنبەي” كەتكەن نۇرسۇلتان نازارباەۆتىڭ كىتاپ جازىپ جاتقانىنان حاباردار ەتكەن بولاتىن. ول نازارباەۆتىڭ اتالمىش كىتابى ارقىلى حالىقتىڭ كوكەيىندەگى ءبىرشاما سۇراقتارعا جاۋاپ بەرەتىنىن جازعان.
