Túrli paraqshalardaǵy derekterge súıensek, Nazarbaev óziniń estelikteri kitap etip jazǵan. Kitap «Meniń ómirim. Táýeldilikten bostandyqqa deıin» degen atpen jaryqqa shyǵýǵa daıyndalýda, dep habarlaıdy "Adyrna" portaly telegram arnalardyń birindegi aqparatqa siltep.
Kitapta eks-prezıdenttiń 90-jyldardaǵy qıyndyqtary, elorda qurylysy, óz ómiriniń aıtylmaǵan tustary jáne t.b. dúnıeler qamtylǵan, delingen derekkózde.
Sol kitapta Nazarbaevtyń Ásel Isabaevamen ekinshi otbasy qurǵanyn moıyndaýy erekshe nazar aýdartatyn sııaqty. Sonda Nazarbaev saıasattaǵy qateligin emes, ekinshi nekesin moıyndaǵandaı áser qaldyrady.
Ásel Isabaeva týraly kópten beri aıtylyp kele jatyr. Tipti Áseldiń "Alekseı" degen laqap aty da telefon arqyly sóılesken kezde Nazarbaevtyń qol astyndaǵylar paıdalanatyn kodtyq esimge aınalyp ketken. Bul týraly derekter aqparat alańynda mol. Biraq osy kúnge deıin ony eshkim rastamaǵan jáne joqqa da shyǵarmaǵan.
Memýar-esteliginde eks-prezıdent Isabaevamen musylmandyq neke qıǵanyn aıtyp, odan Taýman (2005 jyly týǵan) men Báıken (2010 jyly týǵan) esimdi perzent súıgenin rastaǵan sııaqty.
Sondaı-aq, kitapta 2011 jylǵy Jańaózendegi oqıǵa, 2019 jylǵy bılik tranzıti, Qandy Qantar oqıǵasyna bólek taraýlar arnalǵan. Qazirgi prezıdent Toqaevtyń da aty atalyp, olardyń qarym-qatynasynyń bir-eki qyzyq, buryn estimegen tustary da aıtylatyn kórinedi.
Ázirge kitaptyń satylymǵa qashan shyǵatyny belgisiz. Alaıda, belgili saıasatkerler men birneshe qoǵam belsendileri alǵashqy oqyrmandar sanatynan tabylǵan syńaıy bar.
Buǵan deıin, jazýshy Beıbit Saparaly “kórinbeı” ketken Nursultan Nazarbaevtyń kitap jazyp jatqanynan habardar etken bolatyn. Ol Nazarbaevtyń atalmysh kitaby arqyly halyqtyń kókeıindegi birshama suraqtarǵa jaýap beretinin jazǵan.
