فوتو جي-مەن جاسالعان
پرەزيدەنت قاسىم-جومارت توقاەۆ سوت توراعالارىن، سوت القالارىنىڭ توراعالارى مەن سۋديالاردى تاعايىنداۋ جانە قىزمەتىنەن بوساتۋ تۋرالى جارلىققا قول قويدى، دەپ حابارلايدى “ادىرنا”.
2026 جىلدىڭ 1 قازانىنداعى №1511 قۇجاتقا سايكەس، بىرقاتار سوت باسشىسى مەن سۋديانىڭ وكىلەتتىگى توقتاتىلدى.
ايىپتاۋ ۇكىمدەرىنىڭ زاڭدى كۇشىنە ەنۋىنە بايلانىستى سولتۇستىك قازاقستان وبلىسىنداعى ەكى سوت توراعاسى — بەكبول بايماحانوۆ پەن ەرلان يبراەۆ قىزمەتىنەن بوساتىلدى. ال سوت ءجيۋريىنىڭ تارتىپتىك تەرىس قىلىققا قاتىستى شەشىمى بويىنشا ۇلىتاۋ وبلىستىق سوتىنىڭ قىلمىستىق ىستەر جونىندەگى سوت القاسىنىڭ توراعاسى قانات شايقامالوۆ، الماتى قالاسى الاتاۋ اۋداندىق سوتىنىڭ سۋدياسى داۋرەن ايقۇلوۆ جانە تۇركىستان وبلىسى ورداباسى اۋداندىق سوتىنىڭ توراعاسى ايجان ساتىبالديەۆا قىزمەتىنەن بوساتىلدى.
جارلىقپەن اباي وبلىسىنىڭ جارما اۋداندىق سوتىنا ايگۇل سادۋاقاسوۆا، قوستاناي وبلىسىنىڭ رۋدنىي قالالىق سوتىنا شولپان ناقىپوۆا توراعا بولىپ تاعايىندالدى. سونداي-اق ەلىمىزدىڭ بىرقاتار وڭىرىندەگى سوتتارعا جاڭا سۋديالار تاعايىندالدى.
بۇدان بولەك، بىرقاتار سوت توراعاسى وكىلەتتىك مەرزىمىنىڭ اياقتالۋىنا بايلانىستى توراعالىق قىزمەتتەن بوساتىلىپ، سۋديا بولىپ قالدى. كەيبىر سوت باسشىلارى ءوز ءوتىنىشى بويىنشا قىزمەتىنەن كەتىپ، سۋديالىق وكىلەتتىگىن ساقتادى. بىرقاتار سۋديا وتستاۆكاعا شىعۋىنا نەمەسە باسقا جۇمىسقا اۋىسۋىنا بايلانىستى قىزمەتىنەن بوساتىلدى.
جارلىققا سايكەس، سوت جۇيەسىندە استانا، الماتى جانە شىمكەنت قالالارىمەن قاتار، اباي، اقتوبە، الماتى، اتىراۋ، باتىس قازاقستان، جەتىسۋ، قاراعاندى، قىزىلوردا، سولتۇستىك قازاقستان جانە شىعىس قازاقستان وبلىسىندا كادرلىق وزگەرىستەر بولدى. قۇجات قول قويىلعان كۇنىنەن باستاپ كۇشىنە ەندى.
