ءۇندىستاننىڭ سولتۇستىگىندەگى قۇتقارۋشىلار گيمالايدا وپىرىلعان تۋننەل ءۇيىندىسىنىڭ استىندا قالعان جۇمىسشىلاردى قۇتقارۋ وپەراتسياسىن اياقتادى. ولار 17 كۇن جەر استىندا بولدى، دەپ حابارلايدى "ادىرنا" پورتالى ۆۆس-گە سىلتەمە جاساپ.
15:30 (ماسكەۋ ۋاقىتىمەن 18:30) شاماسىندا ۋتتاراكحاند شتاتىنىڭ ۇكىمەتى بارلىق 41 ادامنىڭ قۇتقارىلعانىن حابارلادى.
تۋننەلدىڭ وپىرىلۋى 17 كۇن بۇرىن 4,5 شاقىرىم تەرەڭدىكتە بولعان.
قۇزىرلى ورىندار قۋانىشقا وراي ادامداردىڭ امان ەكەنىن اتاپ ءوتتى. جەر استىندا قالسا دا ۇزىندىعى شامامەن ەكى شاقىرىم جانە بيىكتىگى 8,5 مەتردەي كەڭىستىكتە بولدى.
قالىڭ ۇيىندىگە العاشقى ساڭىلاۋ تەسىلگەن بويدا، قامالعان حالىق مۇمكىندىگىنشە ازىق-تۇلىكپەن، سۋمەن جانە وتتەگىمەن قامتاماسىز ەتىلدى. بىراق وتتەگى تاپشىلىعى ەرتە مە، كەش پە، ولاردىڭ جاعدايىنا تەرىس اسەر ەتە باستايدى دەگەن قاۋىپ بولدى.
قۇتقارۋ جۇمىستارىنا جۇزدەن استام ادام قاتىستى. قۇتقارۋشىلار سوڭعى بەس مەتردى بۇرعىلاپ، ودان كەيىن 57 مەترلىك قۇبىر ارقىلى جۇمىسشىلاردى جەر بەتىنە شىعارۋعا كىرىسكەنى حابارلاندى.
دۇيسەنبىدە ۇندىستانداعى «ەگەۋقۇيرىق شاحتەرلەرى» دەپ اتالاتىن قۇتقارۋشىلاردىڭ ارنايى بولىمشەسى قۇتقارۋ وپەراتسياسىنا تارتىلدى.
بۇل كوماندالار قولداناتىن ءادىس نەگىزىنەن كومىر شاحتالارىندا قولدانىلادى جانە وتە تار كەڭىستىكتە جۇمىس ىستەۋدى قامتيدى.
