Búgin, 26 qarashada Almaty qalasyndaǵy «Saryarqa» kınoteatrynyń artyndaǵy saıabaqta «Janýarlar álemine» joq de!» atty zorlyq-zombylyqqa qarsy akııa ótti, dep habarlaıdy «Adyrna» tilshisi.
Is-sharany «Jańa adamdar» jastar qozǵalysy uıymdastyrdy. Belsendilerdiń aıtýynsha, akııanyń basty maqsaty — qazaq qoǵamyndaǵy zorlyq-zombylyq máselesine nazar aýdartý.
Sharaǵa kóptegen bloger, 600-ge jýyq qala turǵyny jáne BAQ ókilderi qatysty.
Akııaǵa kelgen marqum Saltanat Núkenovanyń aǵasy Aıtbek Amangeldi 2 aptanyń ishinde ómiriniń túbegeıli ózgergenin atap ótti. Aıtýynsha, Qazaqstan otbasylyq zorlyq-zombylyq máselesi boıynsha jańa zań qabyldaýy tıis.
«Bizge otbasylyq-turmystyq zorlyq-zombylyqqa qarsy jańa zań qajet. Álemdi ózgertýdi ózimizden bastaýymyz tıis. Zorlyq-zombylyq týraly ashyq aıtyp, quzyrly organdarǵa habarlasý qajet. Dál osylaı úndemeı júre bersek, eshteńe ózgermeıdi. Bizdiń jaǵdaıdy eshkimniń basyna bermesin dep tileımin»,—dedi ol.
Al tanymal telejúrgizýshi, bloger Dıana Qyryqbaı ata-analardy balalaryn kishkentaı kezinen durys tárbıeleýge shaqyrdy.
«Marqum Saltanatty jaqsy tanımyn. Ekeýmiz Astanadaǵy fıtnes ortalyqtardyń birinde sportpen aınalysqan edik. Ortaq tanystarymyz bar. Jaqynda bolǵan jaǵdaıdy estigen kezde bárimizdiń júregimizde qorqynysh paıda boldy. Bul oqıǵaǵa beı-jaı qaraı almadym. Únemi áleýmettik jeli arqyly názik jandylardy kóp oqýǵa, óz jaǵdaıyn jasaýǵa, erte otbasyn qurmaýǵa shaqyramyn. Barsha ata-ana balaǵa kishkentaı kezinen durys tárbıe berip, qyz balasyn urmaý kerektigin túsindirse, durys bolar edi»,—dedi jýrnalıst.
Akııaǵa qatysýshylar is-sharaǵa «Zorlyq zombylyq bizdiń dástúr emes», «Áke, anamdy urmashy», «Kelesi qurban bolýdan qorqamyn» syndy túrli jazýy bar plakattermen kelip, zorlyq-zombylyqty qoldamaıtyndaryn jetkizdi.
