كولىك ءمينيسترى مارات قاراباەۆ اۋە بيلەتتەرىنىڭ قىمباتتاۋىن حالىقتىڭ ءال-اۋقاتىنىڭ وسۋىمەن ءتۇسىندىردى، دەپ حابارلايدى "ادىرنا" ءتىلشىسى قازتاگ-قا سىلتەپ.
مينيستر قاراباەۆ قوستاناي وبلىسىنىڭ تۇرعىندارىمەن كەزدەسۋدە:
"ۇشۋلاردىڭ قولجەتىمدىلىگى-قوعامدا ءجيى تالقىلاناتىن ماسەلە. بيلەتتەر قىمبات-ءبىز مويىندايمىز. قازىر ءبىز جاڭا لوۋكوستەر مەن حالىقارالىق كومپانيانىڭ قازاقستاندىق نارىققا شىعۋ ماسەلەسىن پىسىقتاپ جاتىرمىز", - دەدى.
كولىك مينيسترلىگىنىڭ سوزىنشە، "باسەكەلەستىك پايدا بولادى-بيلەت قۇنى تومەندەيدى".
"سونىمەن قاتار، ازاماتتاردىڭ ءال-اۋقاتى دا ۇنەمى ءوسىپ كەلەدى. بۇل اۋە تاسىمالدارعا سۇرانىستىڭ جىل ىشىندە 27% - عا وسۋىمەن ايعاقتالادى. ونى قامتاماسىز ەتۋ ءۇشىن ءبىز جاڭا ۇشاقتاردى ساتىپ الا باستادىق. بيىل تاعى 11 ۇشاق ساتىپ الامىز، سودان كەيىن قازاقستاندا 100 ۇشاق بولادى. ال 2025 جىلعا قاراي وتاندىق جولاۋشىلار اۋە كومپانيالارىنىڭ 145 جەكە بورتى بولادى دەپ جوسپارلاپ وتىرمىز. سونداي - اق، جاڭا اۋە مارشرۋتتاردى ىسكە قوسۋ جوسپارىمىزدا بار", - دەيدى قاراباەۆ.
