تاريحشى ءامىرجان الپەيىسوۆتىڭ مۇرات اۋەزوۆتىڭ ءومىرى مەن ەڭبەك جولىنا ارنالعان «مۇرات» رومان-ەسسەسى جارىق كوردى، دەپ جازادى Kazinform. بۇل تۋرالى «ادىرنا» ۇلتتىق پورتالى حابارلايدى.
«مەن مۇرات اۋەزوۆ سياقتى قازاقتىڭ تاۋەلسىزدىگى ءۇشىن سوناۋ كەڭەس زامانىنىڭ وزىندە ۇگىت-ناسيحات جاساپ، «سارىارقا» دەگەن ۇيىمنىڭ مۇشەسى بولعان ەدىم. سوندىقتان مۇرات اۋەزوۆ ءبىزدىڭ كوسەمىمىز، جول باستاۋشىمىز سياقتى. ءبىز «جاس تۇلپاردىڭ» قاناتىنىڭ استىنان شىققان جاس ستۋدەنتتىك ۇيىمدار بولدىق. سول جاس ۇيىمداردىڭ مۇشەسى بولىپ، 70-جىلداردان بايلانىس ورناتتىق»، — دەيدى اۆتور ءامىرجان الپەيىسوۆ.
كەشە ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە كىتاپتىڭ تۇساۋكەسەرى ءوتتى. شىعارمادا مۇرات اۋەزوۆتىڭ ءومىربايانى مەن ەڭبەك جولى باياندالعان. سونداي-اق «جاس تۇلپار» ۇيىمىن قۇرعانى جايلى تولىق مالىمەت بەرىلگەن.
اۆتور — مۇرات اۋەزوۆتىڭ رۋحتاس-ۇزەڭگىلەس ءىنىسى.
كوپشىلىك وقىرمانعا ارنالعان «مۇرات» رومان-ەسسەسى مۇرات اۋەزوۆتىڭ مەملەكەت قايراتكەرى رەتىندە تۇلعاسىن اشىپ، جاستارعا وتانسۇيگىش قاسيەتتىڭ قانداي بولاتىنىن كورسەتە بىلگەن.
«ادىرنا» ۇلتتىق پورتالى
