الماتى قالاسى رەسپۋبيليكانىڭ نەگىزگى ەكونوميكالى ورتالىعى مەگاپوليس ەكونوميكاسىنىڭ باسىم بولىگىن شاعىن جانە ورتا بيزنەس قۇرايدى - 57,5%، وندا 869 مىڭ ادام نەمەسە ەكونوميكالىق بەلسەندى حالىقتىڭ 83%-ى جۇمىس ىستەيدى. بۇل تۋرالى وڭىرلىك كوممۋنيكاتسيالار قىزمەتىنىڭ الاڭىندا الماتى قالاسىنىڭ كاسىپكەرلەر پالاتاسى وكىلىنىڭ قاتىسۋىمەن وتكەن ءباسپاسوز-ءماسليحاتىندا ءمالىم بولدى، دەپ حابارلايدى «ادىرنا» ءتىلشىسى.
«الماتى - قازاقستاننىڭ ءىرى قالالىق ەكونوميكاسى بار قارجى مەگاپوليسى، سونىمەن قاتار ول نەگىزگى الەۋمەتتىك-ەكونوميكالىق كورسەتكىشتەر بويىنشا كوش باسىندا. ءبىزدىڭ قالا ءجىو-ءنىڭ بەستەن ءبىر بولىگىن، ەل بيۋدجەتى تۇسىمدەرىنىڭ تورتتەن ءبىر بولىگىن قۇرايدى، سوندىقتان دا ول ەكونوميكالىق ورتالىق بولىپ سانالادى. قالا ەكونوميكاسىنىڭ ءجوو قۇرىلىمىندا ساۋدا جانە قىزمەت كورسەتۋ سالالارى باسىم بولىپ تۇر، ولاردىڭ ۇلەسى 86,1% - قۇرايدى»، - دەدى الماتى قالاسى كاسىپكەرلەر پالاتاسىنىڭ حالىقارالىق ىنتىماقتاستىق ءبولىمىنىڭ باسشىسى اينۇر باسپاقوۆا.
سپيكەردىڭ ايتۋىنشا، 2022 جىلى شىعارىلعان شوك ءونىمىنىڭ كولەمى 15,7 ترلن تەڭگەنى قۇرادى، ونەركاسىپ ءونىمىنىڭ ناقتى كولەمىنىڭ يندەكسى (نكي) – 131,1%.
سونىمەن قاتار، ا. باسپاقوۆا اتاپ وتكەندەي، بيزنەستى مەملەكەتتىك قولداۋ بويىنشا جۇيەلى جۇمىس جۇرگىزىلۋدە. جاڭا جۇمىس ورىندارىن قۇرۋ ماقساتىندا قارجىلاي جانە قارجىلاي ەمەس قولداۋ قۇرالدارىنىڭ كەڭ جيىنتىعى تارتىلدى.
2023 جىلعى قاڭتار-مامىردا رەسپۋبليكانىڭ بولشەك ساۋداسىنىڭ جالپى كولەمىندەگى ەڭ كوپ ۇلەس سالماعى الماتى (31,4%) جانە استانا (12,2%) قالالارىنا، سونداي-اق قاراعاندى (7,7%) جانە شىعىس قازاقستان (6,3%) وبلىستارىنا تيەسىلى.
«الماتى ەلىمىزدىڭ ساۋدا قاتىناستارى ورتالىعى. مۇندا ساۋدا، قىزمەت كورسەتۋ، ءوندىرىس سالالارىندا قازاقستاننىڭ شاعىن جانە ورتا بيزنەس كاسىپورىندارىنىڭ ەڭ كوپ سانى شوعىرلانعان. شەت مەملەكەتتەردىڭ بارلىق باس ەلشىلىكتەرى الماتىدا ورنالاسقان، ءبىز ولارمەن دوستىق، سەرىكتەستىك قاتىناستار ورناتتىق، ولارمەن تۇراقتى نەگىزدە ءوزارا ءىس-قيمىل جاسايمىز، اقپارات الماسامىز، بىرلەسكەن كەڭەستەرگە قاتىسامىز، ءىس - شارالاردى ۇيىمداستىرۋعا جاردەمدەسەمىز، شەتەلدىك كومپانيالارعا قولداۋ كورسەتەمىز، ساۋدا-ەكونوميكالىق قاتىناستاردى دامىتۋ ءۇشىن ىنتىماقتاسامىز»، - دەپ جالعاستىردى ا.باسپاقوۆا.
ماسەلەن، جىل باسىنان بەرى كاسىپكەرلەر پالاتاسى قىتايدىڭ 7 پروۆينتسياسىنىڭ ساۋدا پالاتالارىنىڭ وكىلدىكتەرىمەن، ساۋدا پالاتالارىمەن، سونىڭ ىشىندە فەيسالاباد، لاحور (پاكىستان) قالاسىنداعى ايەلدەر ساۋدا پالاتالارىمەن مەموراندۋمدارعا قول قويدى. سونداي-اق وڭتۇستىك-شىعىس ازيا ەلدەرىمەن ءوزارا قارىم-قاتىناستار بەلسەندى تۇردە ورناتىلۋدا، ۆەتنام، يندونەزيا، تايلاند وكىلدەرىمەن كەزدەسۋلەر مەن ءىس-شارالار وتكىزىلدى. 2 قاراشادا مالايزيا دەلەگاتسياسىمەن كەزدەسۋ وتەدى. تاياۋ شىعىس، ەۋروپا، تمد، اقش ەلدەرىمەن ىنتىماقتاستىق ورنادى.
سونىمەن قاتار، «اتامەكەن» كاسىپكەرلەر پالاتاسى، قازاقستاننىڭ سىرتقى ساۋدا پالاتاسى قازاقستاندىق كاسىپكەرلەردىڭ حالىقارالىق بايلانىستارىن دامىتۋعا جاردەمدەسۋ ءۇشىن حالىقارالىق ءىس-شارالار: فورۋمدار، كونفەرەنتسيالار، B2B كەزدەسۋلەر ۇيىمداستىرادى جانە وتكىزەدى.
«ءبىز شەتەلدىك دەلەگاتسيالاردىڭ وكىلدەرىمەن ءبىرىنشى بولىپ كەزدەسەمىز، ولارعا ءبىزدىڭ ەلىمىزدەگى مۇمكىندىكتەردى تانىستىرامىز جانە ءبىزدىڭ كاسىپكەرلەر كەز كەلگەن ۋاقىتتا بىزگە حابارلاسىپ، بەلگىلى ءبىر ەلمەن ءوز بيزنەسىن دامىتۋ مۇمكىندىكتەرى تۋرالى اقپارات الا الادى. ءبىز ساۋدا سەرىكتەستەرىن ىزدەۋ، ەكسپورتقا شىعۋ ءۇشىن كونسۋلتاتسيالىق قىزمەتتەر كورسەتەمىز. Kazakh Export جانە QazTrade ۇلتتىق كومپانيالارى وتاندىق وندىرۋشىلەرگە ەكسپورتتا قولداۋ كورسەتەدى. قازاقينۆەست ينۆەستيتسيالىق جوبالار مەن ينۆەستورلارعا تىكەلەي قولداۋ كورسەتەدى»، - دەپ تولىقتىردى سپيكەر.
وسى جىلدىڭ 1 قاراشاسىندا كاسىپكەرلەر پالاتاسىنىڭ، قازاقستاننىڭ سىرتقى ساۋدا پالاتاسىنىڭ، ساۋدا جانە كونسالتينگتىك كومپانيالار قاۋىمداستىعىنىڭ قولداۋىمەن الماتىدا ساۋدا تۋرالى، حالىقارالىق ساۋدا تۋرالى مامانداندىرىلعان ءىس – شارا-Tradex حالىقارالىق ساۋدا فورۋمى وتەدى، وندا جەتكىزۋ تىزبەگى، ساۋدا ساياساتىنداعى ۇردىستەر، لوگيستيكا، ەلەكتروندىق كوممەرتسيا، فرانچايزينگ ماسەلەلەرى تالقىلانادى. ءىس-شاراعا 500-دەن استام كاسىپكەر قاتىسۋدى جوسپارلاپ وتىر.
