رەسەيدە 2026 جىلدىڭ 1 قىركۇيەگىنەن باستاپ «جازۋشى» كاسىبي ستاندارتى كۇشىنە ەنەدى، دەپ حابارلايدى "ادىرنا" ءتىلشىسى.
قۇجات 2032 جىلعى 1 قىركۇيەككە دەيىن قولدانىستا بولادى. ول ەلدىڭ ادىلەت مينيسترلىگىندە تىركەلىپ، قۇقىقتىق اقپاراتتىڭ رەسمي پورتالىندا جاريالاندى.
جاڭا ستاندارتقا سايكەس، جازۋشىنىڭ كاسىبي مىندەتتەرى قاتارىندا شىعارمانىڭ تۇجىرىمداماسىن، جانرى مەن قۇرىلىمىن ازىرلەۋ، نەگىزگى ءماتىندى جازۋ، ونى باستاپقى جانە كەيىنگى رەداكتسيالاۋ، ماتەريالدى باسپاعا نەمەسە رەداكتسياعا ۇسىنۋعا دايىنداۋ قاراستىرىلعان.
قۇجاتتا جازۋشىعا قويىلاتىن نەگىزگى تالاپتار دا كورسەتىلگەن. اتاپ ايتقاندا، ول اۋديوۆيزۋالدى شىعارمالاردى ازىرلەۋگە ارنالعان تەحنيكالىق قۇرالداردى پايدالانا ءبىلۋى، اكتەرلەرمەن، ديكتورلارمەن، كومپوزيتورلارمەن، رەجيسسەرلەرمەن جانە پروديۋسەرلەرمەن بىرلەسىپ جۇمىس ىستەي الۋى ءتيىس. سونىمەن قاتار ورىس ءتىلىن جەتىك مەڭگەرىپ، ونىڭ ستيلدىك مۇمكىندىكتەرىن ءتيىمدى قولدانۋى جانە كوركەم شىعارما قۇرۋدىڭ ادىستەرى مەن سيۋجەت قۇرۋ قاعيدالارىن ءبىلۋى قاجەت.
جازۋشى پاۆەل باسينسكي بۇل جاڭاشىلدىققا پىكىر ءبىلدىرىپ، كاسىبي ستاندارتتىڭ ەنگىزىلۋى ءوزىن «ادەبي قىزمەتكەر» اتاۋى قاناعاتتاندىرعانىمەن، كوپتەگەن اۆتور ءۇشىن «جازۋشى» ماماندىعىن رەسمي تۇردە تانۋ الەۋمەتتىك قورعانىس تۇرعىسىنان ماڭىزدى ەكەنىن ايتتى.
قۇجاتقا سايكەس، ادەبي شىعارمالار جازۋمەن باكالاۆريات نەمەسە ماماندانۋ باعدارلاماسى بويىنشا جوعارى ءبىلىمى بار، سونداي-اق جوعارى بىلىكتى كادرلاردى دايارلاۋ باعدارلاماسىنان وتكەن ازاماتتار اينالىسا الادى. بۇل رەتتە ەڭبەك وتىلىنە قاتىستى مىندەتتى تالاپتار قاراستىرىلماعان.
