ەكس-مينيستر قۋاندىق بيشىمباەۆتىڭ سوققىدان قازا تاپقان ايەلى سالتانات نۇكەنوۆانىڭ تۋىستارى ۇندەۋ جاسادى، دەپ حابارلايدى "ادىرنا" ءتىلشىسى.
مارقۇم سالتانات نۇكەنوۆا جۇبايى، بۇرىنعى ەكونوميكا ءمينيسترى قۋاندىق بيشىمباەۆتىڭ قولىنان قازا تاپقان بولاتىن.
ەكس-مينيستر 9 قاراشا كۇنى "Bau" مەيرامحاناسىندا ۇستالىپ، "كۇدىكتى" رەتىندە ەكى ايعا قاماۋعا الىندى.
مارقۇمنىڭ تۋىستارى نۇكەنوۆانىڭ ولىمىنەن كەيىن حالىققا ۇندەۋ جاسادى.
‼️ۇندەۋ
قادىرلى دوستار، قىمباتتى قازاقستاندىقتار.
قىزىمىز سالتاناتتىڭ ايۋاندىقپەن ولتىرىلۋىنە بايلانىستى كوڭىل بىلدىرگەندەرىڭىزگە شىن جۇرەكتەن العىسىمىزدى ايتامىز. سىزدەردىڭ جازعان قولداۋ پىكىرلەرىڭىزدى، شالعان قوڭىراۋلارىڭىزدى، حابارلامالارىڭىزدى، بىلدىرگەن كوڭىلدەرىڭىزدى كورىپ وتىرمىز.
ءبىز زورلىق-زومبىلىق پەن ادام ولىمىنە توزبەيتىن قوعامدا ءومىر ءسۇرىپ جاتىرمىز.سوندىقتان وسى وقيعا رەسپۋبليكا تۇرعاندارىن ءدۇر سىلكىندىردى. سالتاناتتىڭ قازاسى ءالسىز ادامدارعا جاسالاتىن الىمجەتتىككە قارسى كۇرەستىڭ سيمۆولىنا اينالدى.
مارقۇم قىزىمىزدىڭ توپىراعى سۋىماي جاتىپ، الەۋمەتتىك جەلىلەردە ءارتۇرلى الىپ قاشپا اڭگىمەلەر مەن وسەكتەر تاراي باستاعانى جانىمىزعا قاتتى باتتى.
كەيبىر جۋرناليستەر مەن بلوگەرلەر وسى وقيعادان وزدەرىنە ارزان ابىروي مەن جالعان اتاق جيناۋعا كوشىپتى. وسىعان بايلانىستى ءبىزدىڭ اۋلەتتى قاندىقول قىلمىسكەردىڭ تۋىستارىمەن ىمىراعا كەلىپتى دەگەن قانقۋ سوزدەردە پايدا بولىپتى. بىراق بۇل شىڭدىققا سايكەس كەلمەيدى.
ء‼️بىز ەشكىمدى كەشىرگەن جوقپىز.
مىڭداعان ادام قايعىمىزعا ورتاقتاسىپ، شىن كوڭىلدەرىن ءبىلدىرىپ، ءبىزدى جۇباتىپ جاتىر.
اسا قاتىگەزدىكپەن جاسالعان بۇل قىلمىستىق ءىستى جەكە باقىلاۋىنا العان ەل پرەزيدەنتىنە ەرەكشە العىسىمىزدى بىلدىرەمىز.بۇگىنگى كۇنى تەرگەۋ ورگاندارى تاراپىنان قىلمىستى اشۋ بويىنشا كەشەندى شارالار جۇرگىزىلۋدە. پرەزيدەنتتىڭ پارمەنىمەن بۇل وقيعا ەرەكشە تەرگەلەتىن ءىس بولىپ تىركەلدى. قازىرگى ۋاقىتتا سول تۇنگى قىلمىستىڭ قالاي وربىگەنى بۇگە-شىگەسىنە دەيىن ناقتىلانۋدا.
ءبىز وسى قىلمىستىڭ كۋاگەرلەرى بار جانە ولار قىلمىستى اشۋعا كومەكتەسەدى دەپ سەنەمىز. ەگەر قانداي دا ءبىر وسى قىلمىس تۋرالى اقپاراتتار مەن ايعاقتاردى بىلسەڭىز پوليتسياعا نەمەسە ءبىزدىڭ قورعاۋشىلارىمىز: ي و. ۆرانچەۆ جانە ج.م. ورازباقوۆاعا حابارلاسۋىڭىزدى سۇرايمىز.
ەگەر ءسىزدىڭ قىلمىستىق ىسكە قاتىستى ماڭىزدى اقپاراتىڭىز بولسا، بىراق جەكە باسىڭىزدىڭ قاۋىپسىزدىگى ءۇشىن سەكەمىڭىز بولسا، سىزگە زاڭ جۇزىندە مەملەكەت تاراپىنان قورعاۋ كەپىلدىگى بولادى.
ەلىمىزدە وسىنداي جان تۇرشىگەرلىك قىلمىستارعا توزبەۋ قاعيداسىن ۇستانىپ، ءبىزدىڭ اۋلەتتىڭ قايعىسىنا ورتاقتاسىپ، جانى كۇيگەن جۇرتشىلىققا، كۇيزەلگەن كوپشىلىككە ريزاشىلىعىمىزدى بىلدىرەمىز.
نۇكەنوۆتەر اۋلەتى
ەسكە سالا كەتەيىك، سالتانات نۇكەنوۆانى جەرلەۋ ءراسىمى 10 قاراشا كۇنى ءوتتى.
