پاۆلودار وبلىسىندا ءتىل ماسەلەسى كۇيىپ تۇر! ونوماستيكا سالاسىندا دا شەشىلمەگەن پروبلەمالار از ەمەس. وسى ورايدا رەسپۋبليكالىق باق-تا وبلىس اكىمى بولات باقاۋوۆ بىرنەشە مارتە وتكىر سىننىڭ نىساناسىنا اينالدى. سونداي شاقتاردا وسى جولداردىڭ اۆتورى جانە وزگە ءتىل جاناشىرلارى ەرتىستىڭ كەرەكۋ ءوڭىرى جۇرتشىلىعىنىڭ ابىرويىن، اكىمنىڭ ار-نامىسىن مۇمكىندىگىنشە قورعاپ باقتى! ال وبلىس تىلدەردى دامىتۋ جونىندەگى باسقارماسىنىڭ باسشىسى ساۋلە وسمانوۆا بولسا، ءتىل ماسەلەسىنە قاتىسى جوق شەنەۋنىكتەردىڭ ءبىرى سەكىلدى جاعدايدى سىرتتان باقىلاپ ءۇنسىز وتىردى.
2018 جىلدىڭ 19 ناۋرىزىندا «قازاق ءتىلى» قوعامى وبلىستىق ۇيىمىنىڭ باسقارماسى مۇشەلەرى بولات باقاۋوۆتىڭ اتىنا حات جازىپ، ساۋلە وسمانوۆانىڭ كاسىبي بىلىكتىلىگى ءتيىستى دەڭگەيدە ەمەس ەكەندىگى، سونىڭ سالدارىنان ءتىل سالاسىندا ولقىلىقتار ورىن الىپ وبلىستىڭ بەدەلىنە نۇسقان كەلتىرەتىن سىني ماتەريالداردىڭ ءۇستى-ۇستىنە جاريالانعانى جانە باسقارما باسشىسىنىڭ ءتىل جاناشىرلارىمەن ىنتىماقتاسا جۇمىس ىستەي المايتىندىعى جايىندا ايتقان بولاتىن. قوعامدىق ۇيىمنىڭ ءمورى باسىلىپ، بەلسەندىلەرىنىڭ قولى قويىلعان حاتقا وبلىس اكىمىنىڭ ورىنباسارى مەيرام بەگەنتاەۆ «شىعارىپ سالما» جاۋاپ قايتاردى (2018 18 04).
ايماق باسشىسى مەن زيالى قاۋىم وكىلدەرىنىڭ كەزدەسۋىندە ءتىل جاناشىرلارى اتىنان سويلەگەن وسى جولداردىڭ اۆتورى الگى جاۋاپپەن كەلىسپەيتىندىگىن ايتىپ، حات پەن قۇجاتتىڭ كوشىرمەلەرىن بولات باقاۋوۆتىڭ قولىنا ۇستاتقان ەدى. سونداي-اق ساۋلە وسمانوۆانىڭ قوعام بەلسەندىلەرىنە، ءتىل جاناشىرلارىنا جالعان سويلەۋگە بەيىم ەكەندىگى، ءتىپتى ولاردىڭ كەڭەستىك كەزەڭنەن بەرى ءتىل مايدانىنىڭ كۇرەسكەرلەرى اتانعان، جاسى ۇلكەن، بەدەلدى ادامدار ەكەندىگىنە قاراماي ۇرىسا كەتەتىندىگى جونىندە ونىڭ ءوزى مەن وزگە باسقارمالار باسشىلارىنىڭ كوزىنشە ايتىپ سالعان-دى. «ساۋلە عابدىلجاپارقىزىن وبلىس پروكۋراتۋراسىندا جاۋاپتى قىزمەتتە ىستەيتىن باۋىرى مەن ۇلى قولداپ جۇرگەن جوق پا؟» دەگەن كۇماندى ويىن دا زيالى قاۋىم الدىندا جاريا ەتكەن.
سودان بەرى بىرنەشە اي ءوتتى. وبلىس تىلدەردى دامىتۋ جونىندەگى باسقارماسىنىڭ بۇرىنعى باسشىلارى تالعات ابىلقاسىموۆ، قابجان ەدىلبايدىڭ تۇسىندا ءدال سول ازاماتتاردىڭ قامقورلىعىنىڭ ناتيجەسىندە ونداعان جىلدار بويى جارىق كورىپ كەلگەن «قازاق ءتىلى» قوعامى وبلىستىق ۇيىمىنىڭ «ەرتىس ديدارى» گازەتىنىڭ شىعارىلىمى ساۋلە وسمانوۆانىڭ ءتىل باسىلىمىنا دەگەن تەرىس كوزقاراسىنىڭ سالدارىنان توقتادى. وبلىس اكىمىنىڭ ورىنباسارى مەيرام بەگەنتاەۆ وزگە قىزمەتكە اۋىستى. اتالمىش باسقارما وبلىس مادەنيەت، مۇراعاتتار جانە قۇجاتتاما باسقارماسىنىڭ ءبىر ءبولىمى بولىپ قايتا قۇرىلۋىنا بايلانىستى ءبىراز بىلىكتى كادرلار قىسقارتۋعا ۇشىرادى. ەسەسىنە ساۋلە وسمانوۆا ءبولىم باسشىسى قىزمەتىن اتقارىپ ءجۇر.
پاۆلودار وبلىسىنىڭ اكىمى بولات باقاۋوۆ جوعارىدا باياندالعان جايدان تولىق حاباردار بولا تۇرا، قوعام بەلسەندىلەرى مەن ءتىل جاناشىرلارىنا قانداي دا ءبىر جاۋاپ قايتارۋدى ءجون كورمەدى. ەندەشە، «ساۋلە وسمانوۆانى قولداپ جۇرگەن جۇرگەن كىم، بولات باقاۋوۆتىڭ ءوزى مە، الدە باسقالار ما؟» دەگەن ساۋالدىڭ تۋىنداۋى نەگىزسىز ەمەس.
ارمان قاني،
«قازاق ءتىلى» قوعامى پاۆلودار وبلىستىق ۇيىمىنىڭ باسقارماسى مۇشەسى،
قازاقستاننىڭ ەڭبەك سىڭىرگەن قايراتكەرى،
«ءتىل جاناشىرى» قۇرمەت بەلگىسىنىڭ يەگەرى.
