اقش پرەزيدەنتى دونالد ترامپ گازا سەكتورىنداعى پالەستينالىق حاماس قوزعالىسى مەن وزگە دە قارۋلى توپتاردى تولىق قارۋسىزداندىرۋعا باعىتتالعان «تاريحي كەلىسىمگە» قول جەتكىزىلگەنى تۋرالى اقپارات تاراتتى، دەپ حابارلايدى "ادىرنا" ۇلتتىق پورتالى.
شەتەلدىك باق دەرەگىنشە، ترامپتىڭ كەلىسىمى ونىڭ گازا سەكتورىنداعى سوعىستى توقتاتۋعا ارنالعان 20 تارماقتان تۇراتىن جوسپارىن ىسكە اسىرۋداعى ماڭىزدى كەزەڭ بولىپ سانالادى. ول كەلىسىم اياسىندا گازا سەكتورىن پالەستينا حالقىنا قولداۋ كورسەتەتىن بەيبىتشىلىك كەڭەسىمەن بىرلەسىپ جۇمىس ىستەيتىن جاڭا پالەستينا ۇكىمەتىنىڭ باسقارۋىنا بەرۋ كوزدەلەتىنىن ايتتى.
سونداي-اق اقش پرەزيدەنتى قارۋسىزدانۋ پروتسەسى اياقتالعاننان كەيىن يزرايل قورعانىس كۇشتەرى گازا سەكتورىنان شىعارىلاتىنىن جەتكىزدى. ونىڭ سوزىنشە، كەلىسىم اۋىر قارۋ-جاراقتى كەزەڭ-كەزەڭىمەن تاپسىرۋدى، قارۋ-جاراق قويمالارى مەن جەراستى تۋننەلدەرىن جويۋدى جانە بۇل ۇدەرىستى حالىقارالىق باقىلاۋمەن جۇرگىزۋدى قاراستىرادى.
الايدا قازىر حاماس قوزعالىسى دا، يزرايل بيلىگى دە اتالعان شارتتارعا كەلىسكەنى تۋرالى رەسمي مالىمدەمە جاساعان جوق.
ەسكە سالايىق، بۇعان دەيىن حاماس اقش قولداعان سوعىستان كەيىنگى رەتتەۋ جوسپارى اياسىندا گازا سەكتورىنداعى ۇكىمەتىن تاراتقانىن جاريالاعان.
