سيريادا تەرروريستىك توپتا بولعان قازاقستان ازاماتى بولگاريادا ۇستالىپ، ەلگە اكەلىندى. بۇل تۋرالى قازاقپارات اگەنتتىگى جاريالادى، دەپ حابارلايدى ”ادىرنا” ۇلتتىق پورتالى.
اقپاراتقا سايكەس، بۇگىن باس پروكۋراتۋرا، ۇلتتىق قاۋىپسىزدىك كوميتەتى جانە ءىىم ينتەرپولىنىڭ قىزمەتكەرلەرى سىرتقى ىستەر مينيسترلىگىنىڭ جاردەمىمەن بولگاريادان قازاقستان ازاماتىن ەكستراديتسيالادى.
ول تەرروريستىك توپتىڭ جۇمىسىنا قاتىسقانى ءۇشىن قىلمىستىق جاۋاپكەرشىلىككە تارتىلادى.
سونداي-اق، ول راديكالدى ءدىني اعىمنىڭ قولداۋشىسى بولا تۇرا 2015 جىلى سيريا اراب رەسپۋبليكاسىنىڭ اۋماعىنا بارىپ تەرروريستىك توپتىڭ قۇرامىنا كىرگەن. وسىعان بايلانىستى وعان قاتىستى تەرگەۋ باستالىپ، حالىقارالىق ىزدەۋ جاريالاندى.
مامىر ايىندا كۇدىكتى بولگاريا اۋماعىندا ۇستالعان. قازىرگى ۋاقىتتا استانا قالاسىنىڭ تەرگەۋ يزولياتورىندا قاماۋدا وتىر.
ەكستراديتسيا بولگاريا تاراپىمەن 2014 جىلعى 14 قاراشادا جاسالعان ەكىجاقتى شارتتىڭ ارقاسىندا مۇمكىن بولدى.
وعان تاعىلعان ايىپ بويىنشا مۇلكىن تاركىلەۋمەن بىرگە 8 جىلدان 12 جىلعا دەيىن باس بوستاندىعىنان ايىرۋ جازاسى كوزدەلگەن.
