اقمولا وبلىسىندا تۋعان 20 ميلليونىنشى بالانىڭ بىرىنە 2 ملن تەڭگەنىڭ سەرتيفيكاتى تابىس ەتىلدى

1088
Adyrna.kz Telegram
فوتو: اقمولا وبلىسى اكىمدىگىنىڭ ءباسپاسوز قىزمەتى
فوتو: اقمولا وبلىسى اكىمدىگىنىڭ ءباسپاسوز قىزمەتى

اقمولا وبلىسىندا تۋعان 20 ميلليونىنشى بالانىڭ بىرىنە 2 ملن تەڭگەنىڭ سەرتيفيكاتى تابىس ەتىلدى. ايماق باسشىسى پەرزەنتحاناعا بارىپ، ءسابيدىڭ اتا-اناسىن قۇتتىقتادى. بۇل تۋرالى وبلىس اكىمىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.

ءسابي دينارا مەن ايدار يسەنوۆتار وتباسىندا دۇنيەگە كەلگەن. دارىگەرلەردىڭ ايتۋىنشا، انانىڭ جۇكتىلىگى قالىپتى وتكەن، قازىرگى ۋاقىتتا نارەستە مەن انانىڭ جاعدايى قاناعاتتانارلىق.

اقمولا وبلىسىنىڭ اكىمى مارات احمەتجانوۆ ەل پرەزيدەنتىنىڭ اتىنان وتباسىن ءسابيدىڭ دۇنيەگە كەلۋىمەن قۇتتىقتادى.

بۇگىن مەملەكەت باسشىسى قاسىم-جومارت توقاەۆ حالىقتى ەلىمىزدىڭ جيىرما ميلليونىنشى تۇرعىنىنىڭ دۇنيەگە كەلۋىمەن قۇتتىقتادى! وسىناۋ اتاۋلى وقيعاعا ءبىز دە قۋانىشتىمىز. ەلىمىزدىڭ جيىرما ميلليونىنشى تۇرعىنى بولىپ ءومىر ەسىگىن اشقان پەرزەنتتىڭ اقمولا وبلىسىنىڭ ەرەكشە ءبىر كوركەم، كورىكتى، سۇلۋ جەرى بۋرابايدا دۇنيەگە كەلۋى ءبىز ءۇشىن ءتىپتى ەرەكشە سىي! بالا قاي جەردە تۋسا دا، بۇكىل قازاقستان حالقىنىڭ قۋانىشى. مەملەكەت دەنساۋلىق ساقتاۋ مەن بىلىمگە كوپ كوڭىل بولەدى، ءبىزدىڭ بالالارىمىز جاقسى ءبىلىم مەن مەديتسينالىق كومەك الا وتىرىپ، قولايلى ورتادا ءوسۋى كەرەك. بۇل وتانىمىزدىڭ تۇراقتىلىعى مەن وركەندەۋىنىڭ جارقىن ايعاعى، - دەپ اتاپ ءوتتى مارات احمەتجانوۆ.

جاڭا تۋعان ءسابيدىڭ اتا-اناسى قۋانىشىنا ورتاقتاسقان وبلىس باسشىلىعىنا العىسىن ءبىلدىردى.

ءبىزدىڭ وتباسىمىز ءۇشىن بۇل كۇتپەگەن جانە وتە قۋانىشتى كۇن! بۇل ءبىزدىڭ ەكىنشى بالامىز! بارشاڭىزعا بەيبىت اسپان تىلەيمىن! ءبىز ءوز تاراپىمىزدان بالالارىمىزدىڭ باقىتتى وتباسىندا جانە بەيبىت مەملەكەتتە وسۋىنە ىقپال ەتەمىز، - دەدى بالانىڭ اكەسى ايدار يسەنوۆ.

قازىرگى ۋاقىتتا انا سابيىمەن بىرگە «اۆيتسەننا – بۋراباي» جشس انا مەن بالا بولىمشەسىندە جاتىر.

 

پىكىرلەر