اتىراۋ قالاسىنىڭ بالالار ويىن الاڭدارىن كۇتىپ ۇستاۋ ءۇشىن بيۋدجەتتەن 236 228 437 تەڭگە قارجى ءبولىندى، - دەپ حابارلايدى ادىرنا ۇلتتىق پورتالى satypalu.gov.kz/ سايتىنا سىلتەمە جاساپ.
تەندەرگە تاپسىرىستى اتىراۋ قالالىق تۇرعىن ءۇي-كوممۋنالدىق شارۋاشىلىعى جانە تۇرعىن ءۇي ينسپەكتسياسى ءبولىمى بەرگەن. مەملەكەتتىك ساتىپ الۋدى ۇيىمداستىرۋشى اتىراۋ وبلىسىنىڭ قارجى باسقارماسى مەملەكەتتىك مەكەمەسى.
«اتىراۋ قالاسىنىڭ بالالار ويىن الاڭدارىن كۇتىپ ۇستاۋ» دەگەن تاقىرىپپەن 15 قاراشا كۇنى جاريالانعان تەندەردىڭ جەڭىمپاز 22 قاراشا كۇنى انىقتالادى.
تەحنيكالىق سيپاتتامادا اتىراۋ قالاسىندا قانشا ويىن الاڭى بار ەكەنى كورسەتىلمەگەن. 2024 جىلدىڭ 31 جەلتوقسانىنا دەيىن بالالار ويىن الاڭدارىن كۇتىپ ۇستاۋ ءۇشىن ناقتى نە ىستەلۋ كەرەكتىگى دە تۇسىنىكسىز.
قاراڭىز: «تاستاردى جيناۋ جانە تۇپتەۋ – 22,1 مز، ۋچاسكەنi قوقىستان ون رەت تازارتۋ - 22 100 م2, قۇمسالعىشتى قۇممەن تولتىرۋ – 44,2 م2, مەتالل قورشاۋلاردى ۇساق جوندەۋ – 17,68 م2, ت.ب» دەپ جالعاسىپ كەتە بەرەدى.
ۇزىن-سونار تەحنيكالىق سيپاتتامادان اتىراۋ قالاسىندا 40 ويىن الاڭى بار ەكەنىن بايقاۋعا بولادى. الاڭداردى كۇتىپ ۇستاۋ ءۇشىن بيۋدجەتتەن 236 ميلليوننان اسا قارجى جۇمسالىپ وتىرعاندىقتان اتقارىلاتىن جۇمىستىڭ كولەمى، سانى، جوسپارى، تاراپتاردىڭ مىندەتى، بارلىعى دەرلىك تايعا تاڭبا باسقانداي كورىنىپ تۇرۋى كەرەك ەمەس پە؟ ونىڭ ءبىرى دە جوق.
سوندا اتىراۋ قالالىق تۇرعىن ءۇي-كوممۋنالدىق شارۋاشىلىعى جانە تۇرعىن ءۇي ينسپەكتسياسى تەندەر جەڭىمپازىنان ەسەپتى قالاي الادى؟ ءبىزدى وسى ساۋال مازالايدى...
قانات بىرلىكۇلى
ادىرنا ۇلتتىق پورتالى
