قىزىلوردالىق مەملەكەتتىك قىزمەتكەرلەر بەلگىسىز اككاۋنتقا جالاڭاش فوتولارىن جىبەرىپ، بوپسالاۋعا ۇشىراعاننان كەيىن سوتقا ارىزدانعان، دەپ جازادى "ادىرنا" پورتالى. بۇل تۋرالى abdulla.kz پاراقشاسىندا ايتىلدى.
سوتتىڭ مالىمەتىنشە، الاياقتار الەۋمەتتىك جەلىدەگى اۆاتارلارىنا سۇلۋ قىزداردىڭ سۋرەتتەرىن قويىپ، جالعان پاراقشالار اشقان. سونان سوڭ سول قىزدىڭ اتىنان ەر ادامدارمەن اڭگىمە-دۇكەن قۇرعان. ۋاقىت وتە كەلە الاياقتار جالاڭاش سۋرەتتەر جىبەرىپ، شەنەۋنىكتەردەن دە سۋرەت جىبەرۋىن سۇراعان.
كەيىن بۇل ىسكە باندانىڭ باسقا مۇشەلەرى قوسىلعان، ولاردىڭ مىندەتى اقشا بوپسالاۋ بولعان. ولار شەنەۋنىكتەردىڭ سۋرەتىن كوپشىلىككە جاريا ەتەمىز دەپ قورقىتىپ، كارتاسىنا اقشا اۋدارۋدى تالاپ ەتكەن.
وسىلايشا قىزىلوردا وبلىسىندا 12 مەملەكەتتىك قىزمەتكەر الاياقتاردىڭ قۇربانى بولدى.
تەرگەۋدەن كەيىن 11 جابىرلەنۋشى اقشاسىن قايتارىپ العانى بەلگىلى بولدى: ولار وزگە ازاماتتىق تالاپ قويۋدان باس تارتتى. جالعىز ب. ەسىمدى جابىرلەنۋشى كەرى قايتارىلعان 500 مىڭ تەڭگەنى الماي، بوپسالاۋشىلاردى سوتقا بەرۋگە شەشىم قابىلدادى.
سوت وتىرىسىندا سوتتالۋشىلاردىڭ كىناسى دالەلدەندى، الاياقتار كىناسىن مويىندادى.
ءۇش سوتتالۋشىعا قاتىستى سوت ۇكىمى شىعىپ، ولار قازاقستان رەسپۋبليكاسى قىلمىستىق كودەكسىنىڭ 194-بابىنىڭ 2-بولىگىنىڭ 2 جانە 3-تارماقتارىمەن كىنالى دەپ تانىلدى.
ولاردىڭ ارقايسىسىنا 3 جىل 6 اي مەرزىمگە باس بوستاندىعىن شەكتەۋ، سونداي-اق ۇكىمدى ورىنداۋ كەزىندە جىلىنا 100 ساعات ءماجبۇرلى جۇمىسقا تارتۋ جازاسى تاعايىندالدى. سوتتالۋشىلاردان 500 000 تەڭگە كولەمىندەگى زالال بىرلەسىپ ءوندىرىلدى. ۇكىم زاڭدى كۇشىنە ەندى.
ۇقساس جاڭالىقتار
