قازاقستان مەن قىرعىزستان جامبىل وبلىسىنىڭ سۋارمالى جەرىنە سۋ بەرۋ تۋرالى كەلىسىمگە كەلدى، دەپ حابارلايدى "ادىرنا" ۇلتتىق پورتالى. بۇل تۋرالى قر سۋ رەسۋرستارى جانە يرريگاتسيا مينيسترلىگى مالىمدەدى.
بىشكەكتە وتكەن كەزدەسۋدە ەلىمىزدىڭ مۇددەسىن سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ قورعادى. كەلىسسوزدەر قورىتىندىسى بويىنشا تالاس وزەنىندەگى «تۇيتە» كانالى ارقىلى سۋ بەرۋدى قالپىنا كەلتىرۋ بويىنشا ءىس-شارالار اتقارۋ تۋرالى شەشىم قابىلداندى.
قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆتىڭ قىرعىز رەسپۋبليكاسىنىڭ اۋىل شارۋاشىلىق ءمينيسترى اسقاربەك جانىبەكوۆپەن كەزدەسۋى كەزىندە شۋ جانە تالاس وزەندەرىندەگى مەملەكەتارالىق پايدالانۋداعى سۋ شارۋاشىلىعى قۇرىلىستارىن پايدالانۋ جونىندەگى بىرلەسكەن كوميسسياعا ءتيىستى تاپسىرما بەرىلدى.
سونداي-اق، نۇرجان نۇرجىگىتوۆ ەلىمىزگە سۋ جىبەرۋدى جاقسارتۋ ءۇشىن مەملەكەتارالىق پايدالانۋداعى سۋ شارۋاشىلىعى نىساندارىنىڭ تىزبەسىن كەڭەيتۋ قاجەتتىگىن اتاپ ءوتتى. ماسەلەن، قازاقستاندىق تاراپ وسى تىزبەگە كۇركىرەسۋ وزەنىندەگى قۇرىلىستارىمەن «اقمولدا»، «قاراتاقى» جانە «تومەنتامعا» ارنالارىن، شۋ وزەنىندەگى «كولوس» كانالىن جانە تالاس وزەنىندەگى قۇرىلىستارىمەن بىرگە «كوج» كانالىن ەنگىزۋدى ۇسىنادى.
«وزدەرىڭىز بىلەتىندەي، بيىل جامبىل وبلىسىنىڭ شارۋالارى شۋ جانە تالاس وزەندەرىنىڭ باسسەيندەرىندە سۋارمالى سۋ تاپشىلىعىن سەزىندى. سوندىقتان وسىنداي جاعدايدىڭ قايتالانۋىنا جول بەرمەۋ ءۇشىن قىرعىز ارىپتەستەرىمىزبەن بىرگە شۋ جانە تالاس وزەندەرىنىڭ باسسەيندەرىندە كەلەسى ۆەگەتاتسيالىق كەزەڭدى دۇرىس جوسپارلاۋ بويىنشا جۇمىستى الدىن الا جاساۋ وتە ماڭىزدى»، – دەدى قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
شۋ جانە تالاس وزەندەرىندە مەملەكەتارالىق پايدالانۋداعى سۋ شارۋاشىلىعى قۇرىلىستارىن پايدالانۋ جونىندەگى بىرلەسكەن كوميسسيانىڭ كەلەسى وتىرىسى 14 جەلتوقساندا الماتى قالاسىندا وتەدى.
ەستەرىڭىزگە سالا كەتەيىك، وسىعان دەيىن نۇرجان نۇرجىگىتوۆ وزبەكستاندىق ارىپتەستەرىمەن كەزدەسۋدە 1 ساۋىرگە دەيىن تۇركىستان جانە قىزىلوردا وبلىستارىنا 11,1 تەكشە شاقىرىم سۋ، ونىڭ ىشىندە ارال تەڭىزىنە 1,6 ملرد تەكشە مەتر سۋ جىبەرۋ تۋرالى كەلىسىمگە كەلگەن بولاتىن.
