قر جوعارعى سوتىنىڭ توراعاسى جاقىپ اسانوۆ مىرزاعا!
قر باس پروكۋرورى عيزات نۇرداۋلەتوۆ مىرزاعا!
رەداكتسيامىزعا ادىلدىك سۇراپ، جىلاعان انا حابارلاستى. ايتۋىنشا، ىزدەگەنى ادىلدىك، سۇراعانى شىندىق. ساۋلە ۇلىقپان قىتاي حالىق رەسپۋبليكاسىنان قازاقستانعا 2007 جىلى كوشىپ كەلگەن. 2009 جىلى قر ازاماتتىعىن العان. سول جىلى ماۋسىم ايىنىڭ جەتىسى كۇنى كامال نۇسىپبايعا تۇرمىسقا شىققان. 2010 جىلدىڭ قاڭتار ايىندا تۇڭعىش سابيلەرى دۇنيەگە كەلگەن. ارادا 5-6 اي وتكەندە ءسابي شەتىنەپ كەتكەن. دارىگەرلەردىڭ قويعان دياگنوزى جۇرەگىندە تەسىك بولىپتى. اناسى قاتتى قورىققاندا، شوشىنعاندا سابيگە سولاي اسەر ەتەدى ەكەن. ساۋلەنىڭ ايتۋى بويىنشا، كۇيەۋى ۇرىپ-سوققان. ءبىرىنشى بالاما اياعىم اۋىر كەزدە قىلقىندىراتىن دەيدى. اشۋلانسا پىشاق الا جۇگىرەتىن بولىپتى. ودان كەيىن دە دۇنيەگە ەكى قىزدى اكەلگەن.
اقىرى، كۇيەۋىنىڭ مىنەزىنە شىداي الماي، 2017 جىلدىڭ مامىر ايىنىڭ 25 اجىراسقان. اجىراسقان دەگەن اتى عانا، ۇيدەن ەكى قىزىممەن بىرگە قۋىپ جىبەرگەن دەيدى. اجىراسقان كەزدە ساۋلە ۇلىقپان مەن كامال نۇسىپبايعا ورتاق 3 ءۇي بولعان.
بۇل ساۋلە مەن ۇلىقپانعا ورتاق 3 ءۇيدىڭ ساۋلەنىڭ قولىندا بار ەكى ءۇيدىڭ قۇجاتى. كۇيەۋى ەكى بالاسىنا وسى ءۇش ءۇيدىڭ بىرەۋىن بەرمەك تۇگىلى، اليمەنت تە تولەمەپتى. سوتتىڭ شەشىمى شىقسا دا.
كۇيەۋى اليمەنت تولەگەندى قويىپ، وسى ءۇش ءۇيدى دە ءوز اتىنا اۋدارۋ ءۇشىن الاتاۋ اۋداندىق سوتىنا ارىزدانعان ەكەن، سوت كامال ءنۇسىپبايدىڭ شاعىمىن قاناعاتتاندىرماعان. سەبەبى، زاڭ بويىنشا ساۋلە تەڭ قۇقىلى مەنشىك يەسى.
كامال ءنۇسىپباي بولسا ارتىنان قاراساي اۋداندىق سوتىنا ارىز جازعان. ءبىرىنشى سوت وتىرىسى 2019 جىلدىڭ قاڭتار ايىنىڭ باسىندا بولعان. سۋديا دۇيسەنبيەۆ ر.س بولعان. سول كەزدە ءبىرىنشى قارالىمدا سۋديا دۇيسەنبيەۆ ساۋلەدەن نەگە زاڭ جۇزىندە نەكەگە وتىرمادىڭىزدار دەپ سۇرادى. سويتسە، كامال ءنۇسىپباي سىرتتاي جالعان نەكە كۋالىگىن جاساتقان ەكەن. ساۋلە زاڭ جۇزىندە نەكەدەمىز دەپ ويلاعان. بۇل جاعدايدا جالعان نەكە كۋالىگىن جاساعاندار دا جاۋاپقا تارتىلۋ كەرەك.
سۋديا دۇيسەنبيەۆ سول كەزدە ساۋلەگە "نەگە ۇيدەن كەتىپ قالدىڭىز؟ كەتپەي وتىرىپ العاندا زاڭ بويىنشا مىنا مەن سۋديا دا ۇيدەن شىعارا المايمىن" دەگەن.
سوتتىڭ ءۇشىنشى قارالىمىندا سۋديا دۇيسەنبيەۆ "جالعان نەكە كۋالىگى تۋرالى اڭگىمە قوزعاماڭدار، مىنا ءۇش ۇيدە ورتاق مۇلىك بولىپ تابىلادى جانە تەڭ بولىنۋىنە بولادى" دەدى. جانە سول كەزدە سۋديا دۇيسەنبيەۆ ناقتىلاپ، الاتاۋ اۋداندىق سوتىنىڭ شەشىمىن بۇزا المايمىن دەدى. سوت سول شەشىمدە قالادى دەدى.
ساۋلە ۇلىقپان ەكى قىزىمەن پاتەردەن پاتەرگە كوشىپ جۇرگەن كەزدە، قىزى مەيىرباندى كولىك قاعىپ، قايتىس بولدى. بۇل تۋرالى "ادىرنا" ۇلتتىق پورتالىندا 15 مامىردا
باستىقتارعا زاڭ بار ما نەمەسە ولارعا نەشە ادامدى ولتىرۋگە بولادى؟ اتتى ماقالا شىققان بولاتىن.
بىراق، ارتىنان سۋديا دۇيسەنبيەۆ سوزىنەن تايىپ، مامىر ايىنىڭ 21-ءى كۇنى كامال ءنۇسىپبايدىڭ پايداسىنا سوت شەشىمىن شىعاردى. ساۋلەنىڭ ايتۋى بويىنشا، سوتتا بارماق باستى، كوز قىستى بولعان. سەبەبى، سوت كەلمەي تۇرعان كەزدە كامال ءنۇسىپباي مەن سوتتىڭ كومەكشىسى ەكەۋى ءبىر-بىرىنە كوز قىسىسىپ، اڭگىمە ايتىپ، ءماز-مەيرام بولدى. سوعان قاراعاندا سوتتى ساتىپ الدى ما دەپ كۇدىكتەنەم دەيدى.
ساۋلە ۇلىقپاننىڭ ايتۋىنشا، سوت تەك ءادىل شەشىم شىعارسا دەيدى. ءوزىنىڭ زاڭدى قۇجاتتارى ارقىلى وزىنە تيەسىلى زاتتارعا عانا يەلىك ەتسەم بولدى. ءباسپاسوز ارقىلى، سوت ارقىلى ادىلدىككە جەتسەم دەيدى. سوتقا دەگەن، ادىلدىككە دەگەن حالىقتىڭ سەنىمى سەتىنەمەسە ەكەن دەگەن ساۋلەنىڭ ءسوزىن قاز-قالپىندا بەرىپ وتىرمىز.
P.S. اۆتوردىڭ پىكىرى رەداكتسيانىڭ كوزقاراسىن بىلدىرمەيتىنىن ەسكەرتە كەتەمىز. "ادىرنا" پورتالى اشىق پىكىر الاڭى بولعاندىقتان، قارسى تاراپتىڭ دا پىكىرىن جاريالاۋعا دايىنبىز.
وڭعار قابدەن
"ادىرنا" ۇلتتىق پورتالى
