سىرتقى ىستەر ۆيتسە-پرەمەر – ءمينيسترى مۇرات نۇرتىلەۋ ساۋد ارابياسىنىڭ استاناسىندا وتكەن اراب مەملەكەتتەرى ليگاسىنىڭ (لاگ) جانە يسلام ىنتىماقتاستىعى ۇيىمىنىڭ (يىۇ) كەزەكتەن تىس بىرلەسكەن سامميتىنە قاتىستى، دەپ حابارلايدى "ادىرنا" ءتىلشىسى قازاقستاننىڭ سىرتقى ىستەر مينيسترلىگىنە سىلتەمە جاساپ.
سامميتتە سىرتقى ىستەر ءمينيسترى قازاقستان بۇۇ باس اسسامبلەياسىنىڭ 27 قازانداعى توتەنشە ارنايى سەسسياسىندا يوردانيا حاشيميت كورولدىگى ۇسىنعان اتىستى توقتاتۋعا شاقىراتىن قارارعا داۋىس بەرگەنىن ايتتى.
مۇرات نۇرتىلەۋ بەيبىت تۇرعىندار، ونىڭ ىشىندە كوپ بالالار، ايەلدەر مەن قارت ادامدار سوعىستىڭ جازىقسىز قۇربانى بولعانىن اتاپ ءوتتى. گازا سەكتورىنداعى ايەلدەردىڭ، بالالاردىڭ جانە قارتتاردىڭ قاۋىپسىزدىگى باستى باسىمدىق بولىپ قالا بەرەتىنىن جەتكىزدى.
سىرتقى ىستەر ءمينيسترىنىڭ ايتۋىنشا قازاقستان ەگيپەتتىڭ ازاماتتىق حالىققا مەديتسينالىق جانە گۋمانيتارلىق كومەك كورسەتۋ ءۇشىن دالىزدەر بەرۋ تۋرالى شەشىمىن ماقۇلدايدى. قازاقستان پالەستينانىڭ باۋىرلاس حالقى ءۇشىن ءبىر ميلليون دوللار اقشا جىبەرىپ، قوسىمشا گۋمانيتارلىق كومەك جەتكىزۋدى جوسپارلاپ وتىر. قر ءسىم باسشىسى قازاقستاننىڭ 150-دەن استام ازاماتىنىڭ ەلگە ورالا الماي جاتقانىن دا ايتتى.
«مەن بۇل مۇمكىندىكتى پايدالانا وتىرىپ ەگيپەتتى جانە بارلىق قاتىسۋشى تاراپتى، قازاقستان ازاماتتارىن، ولاردىڭ وتباسى مۇشەلەرىن جانە باسقا دا شەتەلدىكتەردى گازا سەكتورىنان ءسوزسىز ەۆاكۋاتسيالاۋعا شاقىرامىن. ءبىز بۇل ازاماتتارعا رافاكتى كەسىپ وتۋگە رۇقسات ەتىلگەننەن كەيىن بىردەن قازاقستانعا ەۆاكۋاتسيالانۋى ءۇشىن شارالار قابىلدادىق»، — دەپ اتاپ ءوتتى قر سىرتقى ىستەر ۆيتسە-پرەمەر – ءمينيسترى مۇرات نۇرتىلەۋ.
«قازاقستان بارلىق حالىقارالىق جانە گۋمانيتارلىق ۇيىمعا گازا سەكتورىنداعى قازىرگى اسا كۇردەلى جاعدايعا ارالاسۋعا شاقىرادى. وسى ماقساتتا ءبىز گازا سەكتورىنىڭ تۇرعىندارى ءۇشىن توتەنشە گۋمانيتارلىق ازىق-تۇلىك باعدارلاماسىن ىسكە اسىرۋ ءۇشىن ازىق-تۇلىك قاۋىپسىزدىگى يسلام ۇيىمىنىڭ قولدانىستاعى تەتىگىن پايدالانۋدى ۇسىنامىز»، — دەدى سامميتتە سويلەگەن سوزىندە سىرتقى ىستەر ۆيتسە-پرەمەر – ءمينيسترى.
مۇرات نۇرتىلەۋ ءسوز سوڭىندا، قازاقستان تاياۋ شىعىستا بەرىك بەيبىتشىلىك ورناتۋ ءۇشىن كەز كەلگەن كۇش-جىگەردى قولداۋعا دايىن ەكەنىن جەتكىزدى.
