الماتىدا جول اپاتى كەزىندە موپەد ەكى كولىكتىڭ اراسىنا ءتۇسىپ قالدى. وقيعاعا قاتىستى قالالىق پوليتسيا دەپارتامەنتى تۇسىنىكتەمە بەردى، دەپ حابارلايدى "ادىرنا" پورتالى.
وقيعا ورنىنان تۇسىرىلگەن ۆيدەو Qumash Telegram ارناسىندا جاريالاندى.
جول اپاتىنا ءۇش كولىك، سونداي-اق ەكى كولىكتىڭ اراسىنا قىسىلىپ قالعان موپەد سوقتىعىسقان. كادرلاردا ازاماتتىق جانە اسكەري كيىم كيگەن ءبىر توپ ادام وقيعا ورنىنا جاقىن جەردە تۇر. كولىكتەردىڭ ءبىرى قاتتى زاقىمدانعان. جازبا اۆتورلارى وقيعانىڭ الماتىدا تۇسىرىلگەنىن العا تارتادى.
قالالىق پوليتسيا دەپارتامەنتىنىڭ ءباسپاسوز قىزمەتى ءمان-جايدى ءتۇسىندىردى.
«بۇل جول-كولىك وقيعاسى الماتى قالاسىنىڭ مەدەۋ اۋدانىندا بولدى، «كرايسلەر» كولىگىنىڭ جۇرگىزۋشىسى ساتباەۆ كوشەسىمەن باتىس باعىتتا كەلە جاتىپ، نازارباەۆ داڭعىلىنا جەتپەي، ءرۋلدى باسقارا الماي، ءۇش جەڭىل كولىكپەن، سونداي-اق موپەدپەن سوقتىعىستى»، - دەدى پوليتسيا.
تۇراقتا تۇرعان كولىكتەردىڭ جۇرگىزۋشىلەرى جول-كولىك وقيعاسى كەزىندە ىشىندە بولماعان، زارداپ شەككەندەر جوق. مەدەۋ اۋدانىنىڭ پوليتسيا قىزمەتكەرلەرى جول-كولىك وقيعاسىنىڭ ءمان-جايىن انىقتاۋعا كىرىستى.
پوسموترەت ەتۋ پۋبليكاتسيۋ ۆ Instagram
