Qazaqstanda dinı salany zańnamalyq qamtamasyz etý boıynsha qolǵa alynyp jatqan sharalar qatarynda betti búrkemeleıtin kıim kııýge shekteý engizilýi múmkin. Bul jaıly úkimet basshysy Álıhan Smaıylovtyń májilis depýtattarynyń saýalyna bergen jaýabynda aıtylǵan, dep habarlaıdy "Adyrna" portaly inbusiness.kz saıtyna siltep.
"Úkimet dinı qyzmet salasyndaǵy zańnamany, atap aıtqanda "destrýktıvti dinı aǵym" jáne "dinı radıkalızm" uǵymdaryn engizý; ... qoǵamdyq oryndarda betti tanýǵa kedergi keltiretin kıim zattaryn kııýge shekteýler engizý jáne taǵy basqalardy jetildirý boıynsha jumys atqarylýda", delingen Úkimet basshysynyń jaýabynda.
Bul máseleler boıynsha sheshim ázirleýge QMDB mamandary, teologtar, sarapshylar qaýymdastyǵy men múddeli memlekettik organdar mamandary tartylǵan.
Úkimet basshysynyń jaýabyna sáıkes, ınternet-keńistikte júıeli túrde dinı ekstremızmniń aldyn alý jáne qarsy nasıhattaý boıynsha jumystar júrgizilip jatyr.
"Kontentti anyqtaý maqsatynda turaqty negizde ınternet-keńistikke monıtorıng júrgiziledi. Dinı taqyryptaǵy quqyqqa qaıshy jáne rezonanstyq materıaldarǵa den qoıýǵa kómektesetin "Kıbernadzor" aqparattyq júıesi jumys isteıdi", delingen jaýapta.
"Kıbernadzor" jumysy arqyly 97 myńnan astam destrýktıvti sıpattaǵy siltemeler buǵattalǵan. Qazaqstandyq qoldanýshylar úshin 248 materıalǵa qoljetimdilik buǵattalyp, al 2971 materıal joıylǵan.
Bıyl áleýmettik jelilerde ekstremıstik materıaldardy taratqany úshin 70-ke jýyq adam ákimshilik jaýapqa tartylǵan.
