Qazaqstanda dıni salany zaŋnamalyq qamtamasyz etu boiynşa qolǧa alynyp jatqan şaralar qatarynda bettı bürkemeleitın kiım kiiuge şekteu engızıluı mümkın. Būl jaily ükımet basşysy Älihan Smaiylovtyŋ mäjılıs deputattarynyŋ saualyna bergen jauabynda aitylǧan, dep habarlaidy "Adyrna" portaly inbusiness.kz saityna sıltep.
"Ükımet dıni qyzmet salasyndaǧy zaŋnamany, atap aitqanda "destruktivtı dıni aǧym" jäne "dıni radikalizm" ūǧymdaryn engızu; ... qoǧamdyq oryndarda bettı tanuǧa kedergı keltıretın kiım zattaryn kiiuge şekteuler engızu jäne taǧy basqalardy jetıldıru boiynşa jūmys atqaryluda", delıngen Ükımet basşysynyŋ jauabynda.
Būl mäseleler boiynşa şeşım äzırleuge QMDB mamandary, teologtar, sarapşylar qauymdastyǧy men müddelı memlekettık organdar mamandary tartylǧan.
Ükımet basşysynyŋ jauabyna säikes, internet-keŋıstıkte jüielı türde dıni ekstremizmnıŋ aldyn alu jäne qarsy nasihattau boiynşa jūmystar jürgızılıp jatyr.
"Kontenttı anyqtau maqsatynda tūraqty negızde internet-keŋıstıkke monitoring jürgızıledı. Dıni taqyryptaǧy qūqyqqa qaişy jäne rezonanstyq materialdarǧa den qoiuǧa kömektesetın "Kibernadzor" aqparattyq jüiesı jūmys ısteidı", delıngen jauapta.
"Kibernadzor" jūmysy arqyly 97 myŋnan astam destruktivtı sipattaǧy sıltemeler būǧattalǧan. Qazaqstandyq qoldanuşylar üşın 248 materialǧa qoljetımdılık būǧattalyp, al 2971 material joiylǧan.
Biyl äleumettık jelılerde ekstremistık materialdardy taratqany üşın 70-ke juyq adam äkımşılık jauapqa tartylǧan.
Ūqsas jaŋalyqtar
