ءبىر كۇن بۇرىن پيلوتتىق رەجيمدە اكىم سايلاۋى وتكەن اۋداندار مەن وبلىستىق ماڭىزى بار قالالاردىڭ باسىم كوپشىلىگىندە وبلىستىق سايلاۋ كوميسسيالارى جاريالاعان سايلاۋ ناتيجەلەرىنە سايكەس، قازىرگى اكىمدەر مەن ولاردىڭ ورىنباسارلارى قايتا جەڭىسكە جەتكەن، دەپ حابارلايدى “ادىرنا” ۇلتتىق پورتالى vlast.kz سايتىنا سىلتەمە جاساپ.
سايلاۋ ناتيجەسىندە، 29 اۋدان مەن وبلىستىق ماڭىزى بار قالادا قىزمەت باسىنداعى اكىمدەر جەڭىسكە جەتسە، اقمولا وبلىسىنىڭ ءبىر اۋدانىندا سول وبلىستىڭ ەكىنشى اۋدانىندا قىزمەت اتقارىپ جۇرگەن اكىم جەڭىسكە جەتتى. تاعى 12 اۋدان مەن قالادا قازىرگى اكىم ورىنباسارلارى جەڭىسكە جەتتى.
تەك ەكى اۋداندا – اقمولا وبلىسىنىڭ ەسىل جانە تۇركىستان وبلىسىنىڭ بايدىبەك اۋداندارىندا كاسىپكەرلەر اكىم بولدى. تاعى ەكى اۋداندا – تۇركىستان وبلىسىنىڭ شاردارا اۋدانى مەن اتىراۋ وبلىسىنىڭ يساتاي اۋدانىندا اۋداندىق ءماسليحاتتاردىڭ قازىرگى توراعالارى اكىم بولىپ سايلاندى.
سايلاۋ وتكىزىلگەن 45 اۋدان مەن وبلىستىق ماڭىزى بار قالانىڭ ەكەۋىندە عانا – اقمولا وبلىسىنىڭ جاقسى اۋدانىندا جانە سولتۇستىك قازاقستان وبلىسىنىڭ مامليۋت اۋدانىندا ايەلدەر اكىم بولىپ سايلاندى.
ورتالىق سايلاۋ كوميسسياسىنىڭ مالىمەتى بويىنشا، سايلاۋعا قاتىسۋدىڭ ورتاشا كورسەتكىشى سايلاۋشىلاردىڭ 62,8 پايىزىن قۇرادى. ەڭ از داۋىس بەرۋ كورسەتكىشى ماڭعىستاۋ وبلىسىندا – 28,96 پايىز، ەڭ جوعارى كورسەتكىش قىزىلوردا وبلىسىندا – 74,29 پايىز بولدى.
قازاقستاندا اۋداندار مەن وبلىستىق ماڭىزى بار قالالار اكىمدەرىنىڭ سايلاۋى پيلوتتىق، ياعني سىناقتىق رەجيمدە ءوتتى جانە وسىنداي اۋماقتىق بىرلىكتەردىڭ تورتتەن ءبىر بولىگىن قامتىدى. بۇل رەتتە ميلليوننان اساتىن قالالاردىڭ اۋدانىندا – استانا، الماتى جانە شىمكەنتتە سايلاۋ وتكەن جوق.
