104 توننادان استام كوكنار سابانى تاركىلەندى. بۇل تۋرالى Polisia.kz جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، ىشكى ىستەر مينيسترلىگى ەسىرتكى قىلمىسىنا قارسى ءىس-قيمىل دەپارتامەنتى باتىس قازاقستان وبلىسىنىڭ پوليتسياسىمەن جانە كولىكتەگى پوليتسيامەن بىرلەسىپ، پروكۋراتۋرانىڭ ۇيلەستىرۋىمەن قۇرامىندا كوكنار سابانى مەن اپيىننىڭ قوسپالارى بار تاعام كوكنارىنىڭ شەتەلدەن جەتكىزىلۋ ارناسىنىڭ جولىن كەسۋ بويىنشا كەڭ اۋقىمدى ارنايى وپەراتسيانى اياقتادى.
ارنايى ماقساتتاعى بولىمشەلەردىڭ قولداۋىمەن قۇرىلعان جەدەل-تەرگەۋ توپتارى ورال، اقتوبە، شىمكەنت جانە الماتى قالالارىنىڭ اۋماعىندا الماتىدا اپيىن كوكنارىن ساتىپ الىپ، ونى ەلىمىزدىڭ باتىسىندا ساتقان سەگىز ادامدى ۇستادى. ەسىرتكى ترافيگىن شىمكەنت قالاسىنىڭ 50 جاستاعى تۇرعىنى ۇيىمداستىرعان. ول اقتوبە مەن ورالداعى ءتورت دۇكەننىڭ يەسى بولىپ شىقتى. سول ارقىلى كۇدىكتى ەسىرتكى جاساۋعا ارنالعان كوكنار سابانى مەن ونەركاسىپتىك ەرىتكىشتى ساتقان. پوليتسيا ءبىر مەزگىلدە استانا، الماتى، ورال، شىمكەنت، اقتوبە، قوستاناي، كوكشەتاۋ، رۋدنىي قالالارىندا 35 ءتىنتۋ ءىس-شاراسىن جۇرگىزىپ، كۇدىكتىلەردى ۇستادى، – دەدى قر ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى سارقىتباي قۇسايىنوۆ.
سونداي-اق، ورال قالاسىندا جۇرگىزىلگەن ءتىنتۋ بارىسىندا ەكى دۇكەندە 13 قاپ كەپتىرىلگەن كوكنار سابانى، ەرىتكىشى بار قوراپتار، تارازىلار، ەسىرتكى ساۋداسىنان الىنعان اقشا اعىندارى تىركەلگەن كاسسالىق جۋرنالدار تاركىلەندى.
ال اقتوبەدە تاعى 68 قاپ كوكنار سابانى، ەرىتكىشى بار قاپتامالار، كاسسالىق جۋرنال جانە قىلمىسكەرلەر ەسىرتكى تاسىمالدايتىن Toyota Highlander جول تالعامايتىن كولىگى تاركىلەندى.
شىمكەنتتە قىلمىستىق بيزنەستى ۇيىمداستىرۋشى ۇستالدى. ونىڭ ۇيىنەن ەسىرتكى ساۋداسىنىڭ قارجى اعىندارى تىركەلگەن التى كاسسالىق جۋرنال، بەس قاپ كەپتىرىلگەن كوكنار سابانى، Toyota Land Cruiser Prado 150 جول تالعامايتىن اۆتوكولىك، سونداي-اق DAF اۋىر جۇك كولىگى تابىلدى.
الماتىدا قىلمىستىق توپ مۇشەلەرىنىڭ ءبىرى جالعا العان قويما ءۇي-جايلارىنا ءتىنتۋ جۇرگىزىلدى. 22 توننادان استام كوكنار سابانى، سونداي-اق BMW X5 اۆتوكولىگى تابىلىپ، تاركىلەندى.
ءبىر مەزگىلدە كولىك پوليتسياسى استانا، الماتى، قوستاناي جانە رۋدنىي قالالارىندا اپيىن كوكنارىن ساتۋ بويىنشا ورتاق وتباسىلىق قىلمىستىق بيزنەستى جولعا قويعان جەتى فيگۋرانتتى ۇستادى.
جۇرگىزىلگەن ارنايى وپەراتسيالار ناتيجەسىندە قىلمىستىق توپتىڭ 15 مۇشەسى ۇستالدى. ولار 15 جىلدان 25 جىلعا دەيىن باس بوستاندىعىنان ايىرىلادى. 104 توننادان استام كوكنار سابانى، 600-دەن استام “تروپيكاميد” جانە “ميدەكس” دارىلىك پرەپاراتتارىنىڭ بوتەلكەلەرى، شامامەن 5 ملن تەڭگە، 4 اۆتوكولىك جانە DAF اۋىر جۇك كولىگى تاركىلەندى. بۇل رەتتە ءبىر رەتتىك دوزا ءۇشىن 0,2 گرامم ەكستراكتسيالىق اپيىن جەتكىلىكتى ەكەنىن اتاپ وتكەن ءجون. وسىلايشا اينالىمعا اپيىننىڭ ءبىر ميلليوننان استام ءبىر رەتتىك دوزاسى جىبەرىلمەدى. تاركىلەنگەن ءونىمنىڭ قۇنى 4 ملرد تەڭگەگە باعالانادى، – دەدى سارقىتباي قۇسايىنوۆ.
