Reseı prezıdenti Vladımır Pýtın orystyń uly kóshbasshysynyń «Altyn ordaǵa» baǵynǵanyn aıtty, dep habarlaıdy "Adyrna" tilshisi.
RF prezıdenti Pýtın qoǵamdyq palatanyń jańa segizinshi quramymen kezdesý ótkizdi. Kezdesýge alǵash ret Reseıdiń Ýkraınadan tartyp alǵan DHR, LPR, Zaporoje jáne Herson oblystarynyń ókilderi qatysty.
Jańa segizinshi quramnyń kezdesýi arnaıy 4 qarashada toılanatyn Reseıdiń Ulttyq birlik kúni qarsańynda ótti.
Prezıdent Pýtın osy jıynda tarıhqa kóz salyp, Reseıdiń uly qolbasshysy sanalatyn Aleksandr Nevskıı ómir súrgen kezeńge toqtalyp, kóshbasshynyń «Altyn ordaǵa» bas ıgenin aıtty.
«Aleksandr Nevskıı ómir súrgen dáýirdi eske alaıyqshy. Ol «Altyn orda» handaryna baryp, bas ıip, tizesin búgip, ant etti. Qyzmet etemin dep ıildi. Nege? Eń aldymen batystyń otarlaýynan saqtanýdy maqsat etti. Ordalyqtar ózderin óte óktem, qatygez ustady. Biraq olar bizdiń tilimizge, mádenıetimizge, dástúrimizge tımedi. Batys otarlaýshylary bolsa, bul qundylyqtarymyzdy joıar edi. Osy qundylyqtardy julyp alsań, onda ult ta birtindep joıylady. Mine, sol sebepti de biz Nevskııdi uly dep qurmetteımiz, áýlıe sanaımyz. Onyń osy tańdaýy úshin qurmet tutamyz», - dedi Pýtın.
Bul týraly belgili saıasattanýshy Ashat Qasenǵalı pikir bildirdi:
“Qazaqtyń memleketi, tarıhy” bolmaǵan degen Reseı basshysy, ózine qarsy ádemi keıs taýyp berdi. Nevskııdiń eskertkishi bizdiń Almatyda tur, onyń salynýyn bizdikiler de, Reseı elshiligi de “zamanynda Qazaq jerinen ótken” degen negizde túsindirdi. Ne úshin ótken? Pýtınniń ózi aıtqandaı uly babalarymyzǵa bas ıip, tize búgý úshin,-dedi saıasattanýshy.
Eske salaıyq, 2014 jyly Reseı prezıdenti Pýtın «Selıger» jastar forýmynda «Qazaqtarda memleket bolmaǵan, memleketti Nursultan Nazarbaev qurdy» degen edi. Onyń bul sózi qoǵamda qyzý talqyǵa tústi.
