رەسەي پرەزيدەنتى ۆلاديمير پۋتين مەن اقش پرەزيدەنتى دونالد ترامپ اراسىندا الياسكادا وتكەن كەلىسسوزدەرى اياقتالدى، دەپ حابارلايدى «ادىرنا» ءتىلشىسى.
2 ساعات 45 مينۋتقا سوزىلعان كەزدەسۋدە تاراپتار ۋكرايناداعى سوعىستى بەيبىت جولمەن رەتتەۋ ماسەلەسىن كوتەردى.
كەلىسسوزدەن كەيىن مەملەكەت باسشىلارى اقش-تىڭ ەلمەندورف–ريچاردسون اۋە كۇشتەرى بازاسىندا بىرلەسكەن ءباسپاسوز كونفەرەنتسياسىن وتكىزدى. جۋرناليستەردەن بولەك، زالدا ەكى ەل دەلەگاتسياسىنىڭ مۇشەلەرى دە بولدى.
پۋتين كەلىسسوزدىڭ ناتيجەلى وتكەنىن اتاپ ءوتىپ، اقش-قا العىسىن ءبىلدىردى.
ء«بىز – جاقىن كورشىلەر. كەلىسسوزدەرىمىز ءوزارا قۇرمەت، تۇسىنىستىك جانە سىيلاستىقپەن ءوتتى. قاجەتتى ءارى پايدالى جۇزدەسۋ بولدى»،—دەدى ول.
سونداي-اق رەسەي پرەزيدەنتى تاعى دا "بەيبىت كەلىسىمگە قول جەتكىزۋ ءۇشىن سوعىسقا تۇرتكى بولعان سەبەپتەرىن جويۋ قاجەت" دەگەن ءسوزىن قايتالادى.
ءوز كەزەگىندە ترامپ قوس تاراپتىڭ «تولىق تۇسىنىستىككە جەتە الماعانىن، ازىرگە كەلىسىم جاسالماعانىن» مالىمدەدى. سونىمەن بىرگە ول كەزدەسۋدى «وتە ناتيجەلى» دەپ اتاپ، رەسەي مەن اقش-تىڭ ۋكرايناداعى سوعىسقا قاتىستى كوپتەگەن تارماق بويىنشا ۋاعدالاسقانىن جەتكىزدى. بۇدان بولەك، اق ءۇي باسشىسى جاقىن ۋاقىتتا ۋكراينا پرەزيدەنتى ۆلاديمير زەلەنسكي مەن ناتو بويىنشا ارىپتەستەرىن تەلەفون ارقىلى كەزدەسۋ قورىتىندىسىنان حاباردار ەتەتىنىن مالىمدەدى.
ايتا كەتەيىك، مەملەكەت باسشىلارىنان بولەك، كەزدەسۋگە رەسەي تاراپىنان سىرتقى ىستەر ءمينيسترى سەرگەي لاۆروۆ پەن ءپۋتيننىڭ كومەكشىسى يۋري ۋشاكوۆ، ال اقش تاراپىنان مەملەكەتتىك حاتشى ماركو رۋبيو مەن ترامپتىڭ ارنايى وكىلى ستيۆ ۋيتكوفف قاتىستى.
بۇل – رەسەيدىڭ ۋكرايناعا اۋقىمدى باسىپ كىرۋىنەن كەيىنگى اقش پەن رەسەي پرەزيدەنتتەرىنىڭ العاشقى كەزدەسۋى.
