الماتىدا حالىقارالىق ساۋدا فورۋمى ءوتتى. ءىس-شارادا كورشىلەس ونعا جۋىق ەلدەن كەلگەن 300 دەلەگات باس قوستى.
جەتەكشى ساراپشىلار ەلەكتروندى كوممەرتسيانىڭ نەگىزگى ترەندتەرىن، يمپورت جانە ەكسپورت سالاسىنداعى پراكتيكالىق ماسەلەلەردى تالقىلادى. سونداي-اق فورۋم اياسىندا فرانشيزا كورمەسى ۇيىمداستىرىلدى.
– ءبىز قيىندىقتارعا قالاي قارسى تۇرامىز جانە مۇمكىندىكتەردى قالاي جاسايمىز؟ مەنىڭ ويىمشا، بۇل سۇراقتارعا اشىقتىق جانە ىنتىماقتاستىق دەپ ەكى سوزبەن جاۋاپ بەرە الامىز. الەم قازىر كوپتەگەن قيىندىقپەن بەتپە-بەت كەلگەنى بەلگىلى. بۇل ماسەلەلەردىڭ بارلىعىن ەلدەر اراسىنداعى تىعىز ىنتىماقتاستىق ارقىلى عانا شەشۋگە بولادى، – دەدى قحر الماتىداعى باس كونسۋلى چجان ۆەي.بيزنەس-حابتىڭ نەگىزگى تاقىرىبى ەلەكتروندىق كوممەرتسيا، فرانچايزينگ، لوگيستيكا جانە جەتكىزۋ تىزبەگىنە ارنالدى. قازاقستاننىڭ ساۋدا وكىلدەرى الماتى بۇگىندە شەتەلدىك كاسىپكەرلەر ءۇشىن قارجى، ساۋدا جانە تۋريستىك ورتالىق ەكەنىن اتاپ ءوتتى. تىركەلگەن زاڭدى تۇلعالاردىڭ سانى 2023 جىلدىڭ 1 قازانىندا شامامەن 15 مىڭعا جەتكەن.
– الماتى، قازاقستان ارقىلى حالىقارالىق نارىققا شىعۋعا مۇمكىندىك بار. پاندەميادان كەيىن ىنتىماقتاستىق قالپىنا كەلۋدە. بيزنەس تۇرلەرى الەمدىك ارەناعا شىعۋعا دايىن. سوندىقتان بيىل شەتەلدىك دەلەگاتسيامەن كوپتەگەن كەزدەسۋ وتكىزدىك، – دەدى كاسىپكەرلەر پالاتاسىنىڭ حالىقارالىق ىنتىماقتاستىق ءبولىمىنىڭ باسشىسى اينۇر باسپاقوۆا.اقپارات: almaty.tv
