بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ ۇلتتىق قورىنان 2024 – 2026 جىلدارعا ارنالعان كەپىلدەندىرىلگەن ترانسفەرت تۋرالى» قر زاڭىنىڭ جوباسى قارالدى، دەپ حابارلايدى "ادىرنا" ۇلتتىق پورتالى.
ماجىلىسكە كوپتەن بەرى جۋرناليستەردىڭ الدىنا شىقپاعان ۇكىمەت باسشىسى ءاليحان سمايىلوۆ كەلگەنىمەن سۇراقتاردىڭ كوبىنە جاۋاپ بەرمەي كەتتى. ءاليحان اسحانۇلى پرەمەر-مينيستر رەتىندە جۋرناليستەردىڭ الدىنا 8 رەت شىققانىن ايتىپ، اقتالدى. ايتسە دە ول 7 ءجۋرناليستىڭ سۇراعىنا جاۋاپ بەرگەنىمەن وزگە ساۋالدارعا جاۋاپ بەرۋدى قاجەت دەپ تاپپادى.
«جۋىردا ءسىزدىڭ اكەڭىز جامبىل وبلىسىنىڭ قۇرمەتتى ازاماتى اتاندى. بۇل قانشالىقتى ادىلەتتى بولدى؟ مۇنى سىزگە جاعىمپازدانىپ جاساپ وتىرعان جوق پا؟» دەگەن ءجۋرناليستىڭ سۇراعىنا پرەمەر-مينيستر «جوق. ول كىسى دەنساۋلىق ساقتاۋ سالاسىندا 40 جىلدان استام جۇمىس ىستەپ كەلە جاتىر. جوعارى كوتەگورياداعى حيرۋرگ. الپىستان استام عىلىمي ەڭبەكتەرى بار. قازىرگە دەيىن ول ءوزىنىڭ تاجىريبەسىن، ءبىلىمىن كوپتەگەن ماماندارعا بەرىپ، ءوزىنىڭ مىندەتىن جالعاستىرۋدا. سوندىقتان دا ول ادىلەتتى دەپ ويلايمىن»، – دەدى ول.
