ىشكى ىستەر مينيسترلىگى ۇقك-مەن بىرلەسىپ، “قورعاس شەكارا ماڭى ىنتىماقتاستىعى حالىقارالىق ورتالىعى” اق اۋماعىنداعى ساۋىقتىرۋ ورتالىعى مەن قوناق ءۇي كەشەنىن بۇركەمەلەپ، زاڭسىز ۇيىمداستىرىلعان پريتوندار مەن كازينولاردىڭ جولىن كەستى. بۇل تۋرالى Polisia.kz جاريالادى، دەپ حابارلايدى “ادىرنا” ۇلتتىق پورتالى.
اقپاراتۇا سايكەس، نىسان تاۋلىك بويى جۇمىس ىستەپ، كۇزەتپەن جانە قاتاڭ فەيس-باقىلاۋمەن قامتاماسىز ەتىلىپ وتقان. نەگىزىنەن شەتەلدىك ازاماتتاردى عانا قابىلداپ وتىرعان.
سونداي-اق، قىلمىستىق “بيزنەس” جوعارى پايدا مەن قۇپيالىلىقتى ۋادە ەتە وتىرىپ، قازاقستاننىڭ جاس قىزدارىن الداپ-ارباۋ ارقىلى جىنىستىق قۇلدىققا تارتۋعا باعىتتالعان.
جەتىسۋ وبلىسى پوليتسيا دەپارتامەنتى ۇيىمداسقان قىلمىسقا قارسى كۇرەس باسقارماسىنىڭ جانە ۇقكد 5 باسقارماسىنىڭ قىزمەتكەرلەرى پروكۋراتۋرامەن كەلىسە وتىرىپ، بەس نەگىزگى فيگۋرانتتى، ونىڭ ىشىندە ەكى شەتەلدىك ازاماتتى ۇستادى.
سونداي-اق ينتيمدىك قىزمەت كورسەتۋمەن اينالىساتىن 18 جاستان 36 جاسقا دەيىنگى جالپى 21 ادام جەتكىزىلدى، ونىڭ ىشىندە 6 شەتەلدىك ايەل.
ءتىنتۋ ءىس-شارالارىنىڭ ناتيجەلەرى بويىنشا اقشا، ويىن اۆتوماتتارى، پوكەر ۇستەلدەرى جانە باسقا دا زاتتاي دالەلدەمەلەر الىندى. سوتقا دەيىنگى تەرگەپ-تەكسەرۋ جەتىسۋ وبلىسىنىڭ پوليتسيا دەپارتامەنتىمەن جۇرگىزىلەدى، – دەدى قر ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
وزگە اقپارات قپك-ءنىڭ 201-بابىنا سايكەس جاريالاۋعا جاتپايدى.
