ەكولوگيا جانە تابيعي رەسۋرستار مينيسترلىگى اڭ اۋلاۋ ەرەجەلەرىنە وزگەرىستەر ەنگىزدى. ەندى جىل سايىن 1 قازان مەن 15 قاراشا ارالىعىندا كيىك اۋلاۋعا رۇقسات بەرىلەدى، دەپ حابارلايدى «ادىرنا» ءتىلشىسى.
باسقارما كيىكتەردىڭ ورالدىق پوپۋلياتسياسىن 20 پايىزعا، بەتپاقدالالىق پوپۋلياتسياسىن 15 پايىزعا قىسقارتۋعا شەشىم قابىلداعان. ولار بۇل شەشىمدى جانۋار سانىنىڭ تاريحي كورسەتكىشتەن اسىپ كەتۋىمەن ءتۇسىندىردى.
«قازاقستاننىڭ بيوالۋانتۇرلىلىگىن ساقتاۋ قاۋىمداستىعى ازىرلەگەن بيولوگيالىق نەگىزدەمەگە سايكەس، جىنىس قۇرامى مەن مەكەندەۋ ورتاسىنا قاراماستان، كيىكتى اۋلاۋ مەرزىمىن 1 قازاننان 15 قاراشاعا دەيىن بەلگىلەۋ ۇسىنىلدى»،– دەلىنگەن قۇجات جوباسىندا.رەسمي دەرەكتەرگە سۇيەنسەك، ەلىمىزدە ەكى ميلليونعا جۋىق اقبوكەن بار. ەسكە سالايىق، بۇعان دەيىن ەكولوگيا جانە تابيعي رەسۋرستار ءمينيسترى ەرلان نىسانباەۆ كيىك سانىنىڭ ارتۋى اۋىل شارۋاشىلىعىنا زيان تيگىزىپ جاتىر دەگەن مالىمدەمە جاساعان ەدى. الايدا ەكولوگتار بيلىك كيىك اتۋعا رۇقسات بەرگەن كۇننىڭ وزىندە جانۋارلاردى بارىنشا ساقتاپ قالۋعا كۇش سالعان دۇرىس دەپ سانايتىندارىن جەتكىزدى.
ۇقساس جاڭالىقتار
