بۇگىن ورتالىق سايلاۋ كوميسسياسى 29 مامىردا «حابار» ارناسىندا الداعى 9 ماۋسىمدا وتەتىن كەزەكتەن تىس پرەزيدەنت سايلاۋىنا قاتىساتىن كانديداتتار اراسىندا تەلەدەبات وتەتىنىن حابارلادى.
"بىراق بۇل دەباتقا، قازىرگى مەملەكەت باسشىسى، پرەزيدەنتتىكتەن ۇمىتكەر 7 كانديداتتىڭ ءبىرى قاسىم-جومارت توقاەۆ قاتىسا الماۋى مۇمكىن. ويتكەنى، 29 مامىردا ەلوردادا جوعارى ەۋرازيالىق ەكونوميكالىق كەڭەستىڭ مەملەكەت باسشىلارى دەڭگەيىندەگى وتىرىسى وتەدى. ءبىز ونداي جوعارى دەڭگەيدەگى ءىس-شارانىڭ وتەتىنىنەن حابارىمىز بولعان جوق. ءدال قازىر - پرەزيدەنت سايلاۋىنىڭ ۇگىت-ناسيحات كەزەڭى. سوندىقتان ونداي ءىس-شارالار وتە كوپ", - دەيدى ورتالىق سايلاۋ كوميسسياسىنىڭ وكىلى ءلاززات سۇلەيمەنوۆا.
ونىڭ ايتۋىنشا، تەلەدەباتقا ۇمىتكەرلەردىڭ شتابىنان 2 ادام قاتىسسا جەتكىلىكتى. كانديداتتىڭ تەلەدەباتتان باس تارتۋعا قۇقىعى بار.
ايتا كەتەيىك، تەلەدەبات 3 راۋندتان تۇرادى. ءبىرىنشى راۋندتىڭ تاقىرىبى – قازاقستاننىڭ ەكونوميكالىق دامۋ باسىمدىقتارى». ەكىنشى راۋند «قازاقستاننىڭ الەۋمەتتىك جاڭعىرۋى» دەپ اتالادى. ءۇشىنشى راۋندتىڭ تاقىرىبى – «سايلاۋشىلارعا ارناۋ». وندا قاتىسۋشىلار تىكەلەي سايلاۋشىلارىنا ارناپ ءسوز سويلەيدى.