قازاقستان اقپارات جانە قوعامدىق دامۋ مينيسترلىگى 29 مامىردا "حابار" ارناسىندا پرەزيدەنتتىككە كانديداتتار اراسىندا تەلەدەبات وتكىزۋدى ۇسىندى. بۇل تۋرالى 24 مامىردا ورتالىق سايلاۋ كوميسسياسىندا وتكەن جيىندا ايتىلدى.
وسك وكىلى ءلاززات سۇلەيمەن قازىرگى كەزدە تەلەدەباتتى وتكىزۋ رەگلامەنتى قاراستىرىلىپ جاتقانىن ايتتى.
قازاقستاندا كەزەكتەن تىس پرەزيدەنت سايلاۋى 9 ماۋسىمدا وتەدى. بۇل جولعى سايلاۋ ەلدى وتىز جىلعا جۋىق باسقارىپ، بيىل ناۋرىزدا قازاقستان پرەزيدەنتى قىزمەتىنەن كەتكەن نۇرسۇلتان نازارباەۆتىڭ قاتىسۋىنسىز وتكەلى وتىر. وتكەن اپتادا ورتالىق سايلاۋ كوميسسياسى جەتى ادامدى پرەزيدەنتتىككە كانديدات رەتىندە تىركەگەن:
- ءسادى-بەك تۇگەل - "ۇلى دالا قىراندارى" رەسپۋبليكالىق قوزعالىسى;
- قازىرگى پرەزيدەنت قاسىم-جومارت توقاەۆ - "نۇر وتان" پارتياسى;
- امانگەلدى تاسپيحوۆ - قازاقستان كاسىپوداقتار فەدەراتسياسى;
- دانيا ەسپاەۆا - "اق جول" پارتياسى،
- تولەۋتاي راحىمبەكوۆ - "اۋىل" پارتياسى;
- جامبىل احمەتبەكوۆ - "قازاقستان كومۋنيستىك حالىق پارتياسى";
- ءامىرجان قوسانوۆ - "ۇلت تاعدىرى" قوزعالىسى.
مامىردىڭ 11-ءى كۇنى باستالعان ەلدە سايلاۋ الدىنداعى ۇگىت-ناسيحات كەزەڭى باستالدى. ول ماۋسىمنىڭ 8-ىنە دەيىن سوزىلماق.
"ازاتتىق" راديوسى
